admin
YiNtatheli kaMthunywa
UMPHATHISIKOLO weAmaswazi Primary School elokitshini lePumula North koBulawayo kubikwa usehluphile ngokuhuquluza imali yesikolo kanye lokuhlukuluza abantwana besikolo osokudala ukuthi izakhamizi zithi kazisamfuni kulesisikolo.
Umphathisikolo lo obizwa ngokuthi Nkosikazi Dorcas Mutonge kubikwa uyazikhethela ikhomithi yabazali abancedisana lesikolo njalo uselesikhathi eside ehuquluza imali yesikolo.
Kubikwa ngaphandle kwendaba yokudliwa kwemali zesikolo abazali bakhalaza ngokuthi UNkkz Mutonge ubhaxabula abantwana ngendlela ezwisa usizi abuye njalo abaxotshe esikolo kuthi nxa kube lomzali olesikhalazo angalaleli, uMthunywa uyakuveza lokhu lamhlanje.
Ekhuluma emhlanganweni obukhona kulesisikolo ngoMgqibelo kuviki ephelileyo, uMnumzana Thabani Moyo uchaze ukuthi umphathisikolo lo uyazikhethela ikhomithi ayifunayo ngenhloso yokudla imali yesikolo.
“Umphathisikolo lo sasikhethe ikhomithi njengezakhamizi wayidiliza wazikhethela eyakhe esenzela ukuzidlela imali yesikolo. Ngikhuluma nje kulabanye abazali abacina betshiya izikhundla zabo kukhomithi ngoba wayesebahluphile ngokuhlala ebathethisa ethi kabalancedo.
“Khathesi sowaze wasala lamalunga amane kuphela kukhomithi yakhe abanye ebaxotsha ethi kabalancedo.
Okunye njalo umphathisikolo lo wazikhethela umabhalani wakhe abadla bonke imali yesikolo ngikhuluma nje lakhathesi nguye osebenzayo kodwa thina njengezakhamizi kasimkhethanga,” kulandisa uMnu Moyo.
UMthunywa ubuye njalo wakhulumisana loNkosazana Sisasenkosi Mlotshwa oyisakhamuzi sakule indawo wachaza ukuthi umphathisikolo lo wamthethisa ngesikhathi ekhalaza ngokwehluleka ukubhadala imali yesikolo. Mina umphathisikolo lo waxotsha umntanami wathi engabuyi esikolo nxa engabhadalanga. Ngathi ngisiyakhalaza kuye ngithi ngizabhadala kuviki ezayo njengoba ngangingakatholi imali wangithethisa wathi ngiyambuluzela kangithathe umntanami ngiyehlala laye ekhaya ngoba akufundwa mahala.
“Ngasuka ngayabikela omunye umbalisikazi wakulesisikolo wangiboleka imali ngabhadala umntanami wasevunyelwa ukuthi afunde,” kutsho uNkszn Mlotshwa.
Kubikwa izakhamizi zakulelilokitshi sezibhale incwadi zayisa emahofisini ezemfundo zibika ukukhathazeka ngendlela uNkkz Mutonge aphatha ngayo abantwana besikolo kanye lezimali zesikolo okudala ukuthi zithi kazisamfuni kulesisikolo.
Ebuzwa ngokukhathaza kwakhe ecingweni uNkosikazi Docus Mutonge walile ukukhuluma lentatheli ethi kayikhulume labakhulu bakhe.
“Mina kangikwazi lokhu ongibuza khona kungamanga ngakho buza uMqondisi wezemfundo ngoba laye useyazi indaba le,” kutsho uNkkz Mutonge.
UMqondisi wezemfundo esabelweni sakoBulawayo uMnumzana Dan Moyo ebuzwa ngale indaba uvumile ukuthi uyayazi.
“Indaba le sengiyizwile ngakho sikhangelele ukuthi sikhiphe abantu bayehlolisisa ukuthi kuliqiniso ukuthi umphathi lo udle imali kumbe ngamanga. Okunye njalo sisazohlolisisa ukuthi kungani izakhamizi zisithi kazisamfuni yena wafakwa nguHulumende,” kuphetha uMnu Moyo.
Online Reporter