admin
Blessing Letwin Dube
INHLANGANISO yeKasi Youth isiphakamise inengi lalabo abangelamsebenzi elokitshini leMzilikazi ngokusungula uhlelo lokweluka amaqhaga eBulawayo Home Industries.
Intsha le yasungula inhlanganiso okuthiwa yiKasi Youth ngo-2014 njalo linhlanganiso ilamalunga alitshumi lanhlanu. Kulamantombazana amathathu lamajaha alitshumi lambili. Indawo yaseBulawayo Industries ingaphansi kwekhansili yedolobho lakoBulawayo njalo ijonge ukufundisa ngemisebenzi yazandla.
UZibusiso Dube umkhokheli waleliqembu ubikele uMthunywa ukuthi wavumelana lamanye amalunga eqembu lakhe ukuthi kungancono bayefundela ukweluka amaqhaga eBulawayo Home Industries.
“Sadinga ulwazi lokweluka eBulawayo Home Industries ukuze lathi senelise ukwenza imisebenzi yezandla. Sihlose ukuthi nxa siqeda izifunso sethu sibelethuba lokuvusa amabhizimusi.”
UDube uthe anduba bayacabange ukuya sebenzelana leBulawayo Home Industries, inhlanganiso yabo yayincedisa ukuthelela i-lawn lamaluba ephakhi yaseMzilikazi.
“Njengabantu abatsha sananzelela ukuthi njengoba singasebenzi, kulokuthi sitshone sihlezi kungcono batshone behlanza ephakini yaseMzilikazi.
“Kuthe ngokuya kwesikhathi izigangi zasezintshontsha impompi zokuthelela i-lawn. Ngakho-ke besekusenza umsebenzi wethu ubenzima. Ngokubona lokhu, sakhetha ukuthi siyethola ulwazi lokweluka amaqhaga,” kutsho Dube.
URonald Gumpo (19) ongomunye weqembu leKasi Youth ekhuluma loMthunywa uveze ukuthokoza ngalumsebenzi awenzayo.
“Kudala ukweluka amalala kwakungumsebenzi wabogogo. Mina njengomuntu wesilisa ngifuna ukutshengisa abanye abatsha ukuthi ngiyenelisa ukweluka ngelala.”
Uqhubekele phambili esithi lolulwazi aselutholile lunengi kakhulu ngoba laye sengenelisa ukufundisa abanye abatsha abangazi lutho ngokweluka amaqhaga.
UNkosikazi Dube ongomunye wabomama abafundisa intsha le ukweluka ukhuthaze abasakhulayo ukuthi bangatshoni behlezi emabholohweni kodwa bafundele imisebenzi yezandla ukuze benelise ukuziphilisa.
“Ngikhuthaza bonke abasakhulayo lapha eMzilikazi ukuthi baze ngobunengi bezofundela imisebenzi yezandla.
Nxa ungathola ulwazi uyenelisa ukuziphilisa, ubelemali njengami,” nguNkkz Dube.
UMthunywa udingisise wathola ukuthi amaqhaga elala athengiswa ngemali engange-$20 linye ngalinye eBulawayo Home Industries.
Online Reporter