Lovemore Dube
IZIMBABWE ilakho ukuvuka isilentshantshu yomhlaba kwezenqindi mhlaka 13 Lwezi lonyaka.
Umdlali wenqindi uNdabezinhle Darlington Phiri oweLobengula koBulawayo njalo ekhule wafunda khona waqala ezokulwa okusemthethweni khona, njalo uzangqikilana loBrandon Daord oweLiverpool, eNgilandi.
Bazabe belwela isicoco se-International Boxing Organisation kusisindo se-flyweight. UPhiri owaqala lumdlalo engaphansi kuka-Anderson Sibanda eLobengula Boxing Academy phose kuminyaka elitshumi edlulileyo, useleminyaka emihlanu ephosa inqindi ku-professional ranks.
Kumidlalo yakhe elitshumi lanye usewise amadoda kahlanu ngesibhakela.
Ababili laba, bazalwela eLiverpool okulojaha abathi nguLetjani Dube laye ovayindelayo osakhulayo kumdlalo lo.
USibanda onguye owaqala lindaba loPhiri uthe uzizwa ephakamisekile ukuthi eLobengula sokusukume osakhulayo waphakamisa abantu lesigaba.
“Angazi ukuthi ngithini kodwa ngizizwa ngiphakanyisiwe ngesenzo somfana. Kutshengisa ukuthi kuyasetshenzwa njalo ngosekelo oluhle singayakude ngomdlalo lo. UPhiri usephakamise uBula-wayo lathi siyiLobengula, abantu angeke besasikhangelela phansi ngoba sikhona.
“Lokhu osekwenziwe nguPhiri kusinika ithemba lokuthi siyasebenza phansi loba siswela usekelo lwemali yokuthi sibalolonge njalo lokuthi sibe lemidlalo lapho labo abangakhula bazakale ukuthi bakuliphi ibanga,” watsho uSibanda.
Akusiyo mvama ukuthi abadlali bakuleli bafike lapho njalo ungowokuqala ukulwa elwela isicoco.
UCharles Manyuchi ulwe kuzinga eliphansi kulelikaPhiri.
UElvis Victor Moyo laye ongomunye wabadlali benqindi waphakamisa uBulawayo leZimbabwe ngokuba lezicoco zenqindi e-Africa uthe umfana kumele asekelwe.
Uthe ukufika kubanga leli akusinto encane njalo abase-United Kingdom ufisa bahambe ngo-bunengi bayemsekela kumdlalo wakhe ozayo.
UPhiri ulwa eseJohannesburg eSouth Africa lapho amathuba angcono njalo lendawo zokulo-longwa zinengi.
