admin
Wayne Ncube
IQEMBU leBulawayo Chiefs FC selitshengisele ukusebenzela abalandeli balo langaphandle kwenkundla yenguqu ngokuncedisa onogada kanye labafana abagcina izimota ngempahla yokugqoka.
Ekhuluma loMthunywa onguye okhangele ngezempahla esitolo seBulawayo Chief uThulani ‘Javas’ Sibanda uthe:
“injongo yeqembu lethu kuhlangene lenhlanganiso yonke yikuncedisa umphakathi ngendlela yonke esingenelisa ngayo. Okwamanje sikhangele ukunceda onogada bebusuku emalokitshini kanye labafana abancedisa ukugcina izimota edolobheni ngempahla yokugqoka.
“Emalokitshini abalisa iNketa, Cowdray Park kanye leSunninghill sesenelise ukubalungisela impahla efana lama reflectors njengabonogada bebusuku (neighbourhood watch) ukuba labo baphathiseke ngesikhathi bencedisa umphakathini,” kulandisa uJavas.
Uqhubekele phambili waveza ukuba injongo yabo njenge qembu yikukhangela umphakathi obesekayo enkundleni.
“Abafana bonke abagqoke ama-reflector vests abhalwe Car Park Watch bathembekile yikho lathi silaso isiqiniseko sokuthi umphakathi uphephile.
“Impahla le ilamabizo abo njalo inhlanganiso yethu ilolwazi lonke ngabafana laba ukwenzela ukuthi lapho uzulu ezizwa engaphephanga senelise ukulandelela ukuba lokhu kwenziwe ngubani besesimlandelela,” kuphetha uJavas.
Online Reporter