Online Reporter
Brandon Moyo
SEKUVELA ukuthi iqembu le-Old Miltonians lizanqotshwa nzima koBulawayo Metropolitan Rugby Football Board (BMRFB) Archer Clothing Rugby League.
Abafana laba sebedlule imidlalo eyisithupha benganqotshwa. Ngempelaviki banqobe iBulldogs 51-0. Okwakhathesi bayibambe esiqongweni ngemiklomelo engu-30, behlukene ngemiklomelo emithathu leMatabeleland Warriors ekunombolo yesibili kulogu. Umqeqetshi we-Old Miltonians uVictor Chiwara uthe loba benqobile, kukhona okusamele bakwenze ukuze iqembu liqine ngamandla kusiyaphambili.
“Kasiqinanga kangako, ngendlela esiyifunayo. Ukunqoba yikunqoba kodwa kunengi okumele sikwenze ekuqiniseni ithimu. Inhloso yikuthi sigcine isicoco sethu njengentshantshu.
“Besitshintsha tshintsha abadlali ukuze sibone ukuthi abasakhulayo badlala njani. Bengakhula nxa singabanikeza ithuba,” kutsho uChirwa.
Kusenjalo, iqembu leWestern Panthers selize lathola ukunqoba lapho libandezela iHighlanders nge 37-9. Bekungumdlalo wesine linqoba ngemva kweyisikhombisa.
Umqeqetshi weWestern Panthers uGeorge “Rollo” Mukorera uthe kuyamjabulisa ukudlala kweqembu lakhe. “Kuhle abakwenzayo abadlali bethu. Kabaqhubekele phambili.”
OweHighlanders, uSilethokuhle “Slater” Ndlovu kazange athabe ngomsebenzi kanompembe.
“Onompembe kabazange bawuphathe kuhle umdlalo,” kutsho uNdlovu.
IPanthers ikunombolo yesithathu ilemiklomelo engamatshumi amabili. IHighlanders ikunombolo yesihlanu, ilemiklomelo eyisitshiya galombili.
