admin
Ncekwenhle Ncube
KULANDELA izikhalazo ezethulwa yizakhamizi zeGwanda kunyanga ezimbili ezedluleyo mayelana lokutshaywa kwezifuyo yizitimela lezimota, abantu bakule indawo sebexwayiswe ukuthi beluse izifuyo zabo kuze kutholakale ucingo lokubiya amadlelo.
Isixwayiso lesi siza ngemva kodaba olwakhitshwa kuphephandaba likazulu izakhamizi zakule indawo zikhala ngokuphela kwezifuyo zazo ngenxa yokutshaywa yizitimela kanye lezimota njengoba amadlelo abo eseduze lomgwaqo.
Kubikwa emhlanganweni obukhona ngoLwesithathu kuviki edluleyo uMnumzana Cephas Zikhali ongumlisa esigabeni seNsindi ukhuthaze izakhamizi zesigaba sakhe ukuthi zingahlali zilinde uHulumende ngoba zingaphelelwa yizifuyo.
Uqhubekele phambili esithi abantu bafunde ukulandela inkomo zabo nxa zisiya emadlelweni. Lokhu kungenxa yokuthi amadlelo aseduze lomgwaqo. Phezulu kwalokho utshani buphakathi komgwaqo lesipolo okwenza izifuyo zabo zibe sengozini.
Ubuye njalo wasola uMthwakazi wonke ngobusela obenzakalayo.
“Sinjenje sikhala ngezifuyo ezitshaywa nsuku zonke yisitimela bakhona abanye abatshontsha ucingo bayelungisa amasimu abo. Akelifunde ukuhlonipha impahla kazulu wonke.
“Njengoba uHulumende wayethembise ukuthi uzasizuzela uncedo ebantwini abangasisiza ekubiyeni imigwaqo yethu, bantu lingatshontshi ucingo lolu nxa engasiphathisa.” kutsho uMnu Zikhali.
Kubikwa izifuyo ezinengi zitshaywa zimota nxa ziquma umgwaqo zisiyadinga amanzi ngoba indawo zamanzi ezinengi sezitshile.
Esinye isakhamuzi sakule indawo esivezwe ngokuthi nguMelusi Dube sithe indaba yokwelusa iyacakisa inkomo kodwa okwakhathesi ibalulekile ngoba izifuyo ezinengi ziyaphela nxa zingeluswanga.
“Indaba yokwelusa inkomo ibuhlungu ngoba zisuka zicake. Kodwa okwakhathesi kuqakathekile njengoba amanzi ekhanya eseluhlupho okwenza izifuyo ziduhe,” kutsho uMnu Dube.
UMthunywa ubuye wezwa ukuthi izakhamizi zakulo umhlubulo zithwele nzima njalo ngamasela enkomo.
Online Reporter