admin
Ncekwenhle Ncube
IMVIMBI yeqembu leHighlanders uPeter ‘‘Biya’’ Muduhwa sethembise abalandeli beqembu ukuthi usasekhona eqenjini njalo uzasebenza gadalala ukuze afeze umsebenzi wakhe awukhangelelweyo eqenjini.
Lokhu kuza kulandela amahemuhemu agcwele ebulenjini lasembikweni ethunyezwa ngabantu kufacebook lakuWhatsApp ukuthi usevumelane leqembu le FC Platinum ukuthi ngomnyaka ozayo uzabe edlala khonale.
Ekhuluma lentatheli kaMthunywa uMuduhwa uthe imbiko le ebhalwa ngabantu ngamanga aluhlaza tshoko njalo konke lokhu okukhulunywayo kakwazi ngoba kakaze akhulume lomuntu weFC Platinum.
“Ngamanga aluhlaza lawa ukuthi mina kusizini ezayo ngizadlalela iFC Platinum. Akukho lokukodwa engikwaziyo ngakho.
“Okwakhathesi kunengi engikukhangelele ukuthi kwenzakale leqembu lethu esilithandayo. Kuyisifiso sami ukuthi lathi njengeBosso sinqobe imidlalo le eseleyo ngoba ithuba lokuthi sibe zintshantshu sisaselalo ngemva kweminyaka eminengi kangaka sacina.
“Iqiniso yikuthi akungiphathi kuhle ukubona abantu belokhe bekhuluma ngami kubi ebulenjini. Kwenza ngizizwe ngiphela amandla noma nje ngingeke ngilahle ithemba eqenjini ngoba ngiyalithanda ngenhliziyo yami yonke,” kuchaza uMuduhwa.
Ubuye wathi mhlawumbe ngabantu abazonda iqembu ababhala izinto ezifana lalezi ngenhloso yokuthi balulaze iqembu ukuze bengenelisi ukuthi banqobe imidlalo abasele layo.
Uqhubekele phambili ekhuthaza abalandeli ukuthi bengahlamukeli iqembu nxa kungathi kunzima. Uthe usekelo lwabo bayaludinga njengoba bekhangelele ukuthi banqobe imidlalo emibili ababhekane layo phakathi kweFC Platinum leHwange.
Uthe imidlalo ayikapheli ngakho ithuba lokuthi babezingqungquthela zenkezo kuwonalo umnyaka baseselalo.
Imbiko egcwele ebulenjini ibiphawula ukuthi imvimbi yeqembu leBosso isithenjiswe ukuthengelwa indlu edulayo emasabhabha, imota njalo leholo eliphezulu nxa ingafaka isayinetsha sayo.
Uphethe ngokuchazela iphephandaba ukuthi iqembu leBosso liqembu elihloniphekayo njalo elilendlela yayo yokwenza izinto ngokuhleleka.
Uthe ukuthi yena uyathengiswa kusemandleni eziphathamandla eziyizo ezibona ukuthi sevuthiwe kumbe sefanele ukuthi ayedlala kwenye indawo noma cha.
“Iqembu leli lihlelekile. Ngeke ngiziphawulele ukuthi sengifunani. Iziphathamandla yizo ezibona konke. Okwami ngingumdlali webhola ngenza lokho umqeqetshi akhangelele ukuthi ngikwenze ukuze iqembu linqobe,” kuphetha uMuduhwa.
Online Reporter