admin
Nkosilathi Sibanda
ABADLALI bamaWarriors abangethuswa yilutho phambili kokuqala komqhugelwano weAfrica Nations Championships ngoba iZimbabwe Football Association ilesiqiniseko sokuthi izaqoqa umdlalo wobungane owodwa, andubana ithimu yesizwe ilubhekise eRwanda ngeSonto.
IZimbabwe ngelinye lamazwe elizancintisa kunkezo yeChan ezweni leRwanda kusukela mhlaka 16 kulinyanga kusiya kumhlaka 7 Nhlolanja.
Inkezo yeChan idlalelwa ngabadlali abakumakuligi aseAfrica kuphela.
Umdlalo wakuqala wamaWarriors umhlaka 19 labomakhelwane iZambia enkundleni yeRubavu. Amanye amazwe azadlala lamaWarriors kuqula likaD yimali leUganda.
Isikhulumi seZifa uXolisani Gwesela ubikele uMthunywa ngoLwesithathu ukuba sebexhumane lamazwe amabili becela ukuthi kube lomdlalo. UGwesela uthe balethemba lokuthi kusasa isizwe seMozambique lizabe selivumile ukuthi lemukele amaWarriors kumdlalo wobungane.
“Ngikhuluma nje siqeda ukuxoxisana labanye bethu beMozambique mayelana ngomdlalo lo. Abalandeli bomdlalo kuleli bazakwazi iqiniso ngomdlalo lo kusiyatshona ilanga kusasa [NgoLwesin]. Sicela ukuthi abadlali bethu beziphakamise, babe lesibindi. Sithi abakhuze uvalo ngoba isizwe sonke sithembele kubo.
“Umqeqetshi wethu uCallisto Pasuwa uqonqosele kakhulu ngokuqakatheka kokuba lomdlalo wobungane anduba abadlali bakhe bayencintisa kuChan. Kumele simlalele ngalokhu njalo sibeke ithemba lokuthi iMozambique izavuma ukunxuswa iZimbabwe. Mhlawumbe kungaba lesinye isizwe esingacela ukuthi sidlale laso phakathi kweviki ezayo,” nguGwesela lo seHarare.
NgoLwesibili uPausuwa ukhalaze ngokuthi loba eselolonge wasuthiseka, kusalele ukuthi abadlali bakhe bathole umncintiswano lesinye isizwe.
“Kumele ngikhangelisise ukujiya komdlalo wabafana phambi kokuba ngikhethe abayibo abalungele ukuyadlala eRwanda.”
Kwakukhangelelwe ukuthi iZimbabwe idlale leCameroon ngomnyaka odluleyo, wehlula ngoba umqeqetshi uPasuwa wamiswa umsebenzi ngenxa yengxabangxoza eyadalwa yiZifa isithi akaxotshwe.
Online Reporter