adminNcekwenhle Ncube
SEBEPHELELWE lithemba abalimi beSigodini eMlomoliwoto kulandela ukutshelwa ngumthombo wamanzi ababesikha kuwo bethelela izilimo zabo zokuthengisa kuyonale indawo.
Kulandela ukuphuza kokuna kwezulu lonyaka abalimi abalima bethelezela eMlomoliwoto esigabeni seBafana Bafana kubikwa sebelenga ngomnxeba nanku imithombo yamanzi isitshile.
Kubikwa isivande lesi sasungulwa nguMnumzana Elliot Moyo ngenhloso yokuncedisa abafelokazi esigabeni sakhe ukuze benelise ukuziphilisa lezimuli zabo.
Ekhuluma lephephandaba likazulu uNkosikazi Siphiwe Sibanda ongomunye wabafelwakazi kule indawo uchaze ukuthi ukuswelakala kwamanzi luhlupho olukhulu endaweni yakibo.
“Sivele asilamigodi eyaneleyo kithi lapha. Manje khathesi sesitshelwe ngumthombo oyiwo ebesiwusebenzisa ukuthelela esivandeni sethu seSizanani.
“Sesisenza okokuvuka emadabukakusa siyegobhozela amanzi ukuze izilimo zethu zizuze amanzi okuthi ziphile. Noma kunjalo amanzi asetholakala awaseneli ngoba abantu baphila khonapha.”
Kubikwa indaba yokutsha kwamanzi isisenza abalimi bakule indawo bathwale nzima.
UNkosikazi Sthembisiwe Ndlovu uchaze ukuthi imali yokuthenga ukudla kanye lokubhadalela abantwana ezikolo ayisatholakali ngoba kungekho okuthengisekayo.
“Abantwana bazaxotswa ezikolo ngoba imali ayisatholakali njengoba kungelamanzi okuthelela izilimo zethu. Ilanga leli litshisa kakhulu okudingeka ukuthi ngabe lezilimo zithelelwa kakhulu kodwa-ke okwamanje akuvumi njengoba umthombo esiwuthembileyo usucitsha.
“Silethemba lokuthi inkokheli zethu zizasebenza lekhansili yethu basigebhele imigodi yamanzi. Sithemba kuzasiphathisa kakhulu ukuthuthukisa isivande sethu njalo senelise ukuthengisa isivuno sethu emadolobheni,” kutsho uNkkz Ndlovu.
Inkokheli zakulesisigaba zithe udubo lwamanzi lunzima njalo lululaza ubukhokheli bazo. Kungakho nje kulezinye inhlanganiso ezizimele zodwa abakholelwa ukuthi zizabasiza.
UMnumzana Elliot Moyo uthe uhlupho lwamanzi lukhona sibili. Kulezinye inhlanganiso ezithembise ukuthi zizasiphathisa endaweni yethu le.
“Ngileqiniso lokuthi lokhu kuzenziwa ngokuphangisa ngoba abantu lenyamazana bengafa ngendla yamanzi.
Imithombo siwomile kanti izifuyo zinatha khatshana kakhulu lathi.
“Sifisa ukuthi uHulumende angenele ancedise abafelokazi laba abalima eSizanani ngokubagebhela umgodi wamanzi ngoba yikho lapho abazuza khona isinkwa sabantwana babo,” kutsho uMnu Moyo.
Online Reporter