Online Reporter
Lovemore Dube
KOMILE kulufifi kuZifa Southern Region Division One.
Abafana behluleka ukulithela emambuleni, ababukeli bajabule. Ubunandi bomdlalo kanobhutshuzwayo busekutheleni ibhola emambuleni kube lempumela kodwa, akunjalo kuZifa Southern Region.
Kuyala phambili okokuthi sebeze badlula kubanga laphakathi laphakathi komnyaka abakhokhelayo ekuhlohleni belayisithupha nje.
KuDivision One kuyimvama ukuthi kube nguye onika amaqembu akuPremier Soccer League abadlali abaphambili. Kodwa, ngalokhu okukhona kuyadanisa osokubangela lokuthi lemidlalo yakhona ingakhwabitheki.
Kulabadlali abayisithupha asebehlohle ayisithupha.
Kubagadli kuloSimba Sithole owake wathatha iPremier League ngodumo edlalela iCasmyn yeTurk Mine.
USithole uleminyaka embalwa edlala kodwa engenelisi ukubuyela kubanga ake abakulo okwenza iHow Mine imthengisele iCape Town Ajax ngoba wayeyimbabazane.
Lokho kwenza njalo wabizwa lakuqembu lesizwe.
Ujahana osakhulayo uAllan Tamburikayi oweZebra Revolution, Prince Nyathi weVictoria Falls, Anesu Saiti owe
Bulawayo Chiefs, iHwange ilababili uMongameli Tshuma lo Marcellin Mlilo.
Kulabane asebehlohle zabanhlanu uJunior Halland we Eagle Life, Tinotenda Chietete oweNkayi United loJames
Chivasa abadlala laye kuzokuthi uMthabisi Ncube weBosso 90.
Kulabalitshumi asebehlohle amane.
Umqeqetshi owafundela umsebenzi eBrazil uDalubuhle Bhebhe uthi isilinganiso lesi siphansi kakhulu.
“Kunzima, isilinganiso lesi siphansi kakhulu,” kutsho uBhebhe.
Ngalesisikhathi somnyaka kukhangelelwe ukuthi ngabe sebahlohla amabhola aphakathi kwe-15 kusiya ku-20.
UChitalu Kasomo ongeqisiyo lemidlalo kaDivision One eWhite City, uthi abaqeqetsha amaqembu kaDivision One kabasebenzi kakhulu ekubalolongeni.
“Engingakutsho yikuthi abaqeqetshi kabasebenzi gadalala ekulolongeni abafana laba. Okumangalisayo yikuthi inengi lalabo abaphezulu kwabahlohlayo ngabadlala phakathi laphakathi kwenkundla kubuye omunye onjengonozinti weBosso 90 uphezulu,” kutsho uChisomo.
Okewadlala kubanga leli edlalela iEagles eyaphiwa udumo ngoBoy Ndlovu labo Elvis Chiweshe, uItai Masawi uthi lokhu kuyinsinda bayitshiye.
“Lokhu kuyadanisa, amajaha la kaselidonsi phambili. Kabalaso isibindi esifunakalayo lobanje ukuthi umuntu athwale iqembu emahlombe, besaba ukuthi kuthiwe baphambanisile nxa bedlala. Akusela ngitsho lohlohla abemathathu,” kutsho uMasawi owadlalela iHighlanders, Black Rhinos leShushine Wolves.
Ekadeni kuDivision One abadlali abafana labo Eddie Zimunya, Labani Ngoma, Benson Soko labo Pio Matongo bebehlohla ayisithupha kumdlalo munye.
Umdlalo wakhathesi awusela badlali abaphiweyo phakathi abangenza izimanga kuhlohlwe njalo labaqeqetshi bafuna ukugcina imisebenzi yabo ngokungadlalisi ibhola elimnandi okuhlohlwa amabhola ambalwa.
