admin
Thokozile Mbedzi
KULESIHAMBI esidabuka eNkayi esihlala eWaterford koBulawayo esenze isenzo esitshwaqisa umzimba nanko phela sithe sibona ibhasi akade beyigadile isifile sathatha lelo thuba sadlwengula umntwana oleminyaka engu-15 laye obesebhasini efanayo.
Umetheswacala uClever Tshuma kubikwa wenze ihlazo leli kuviki ephelileyo esendleleni yokuya koBulawayo esuka eNkayi.
Omunye umfakazi okhulume loMthunywa othande ukubizwa ngokuthi nguMaDube nje kuphela uthe abesilisa sebesesabeka lezinsuku.
“Amadoda asesesabeka lezinsuku. Kambe umuntu angaze abambele umntwana iganyavu ebhasini kubizwa kuthiweni khonokhu?
“Umntwana uveze ukuthi ibhasi ifele endleleni abantu abanengi behla badinga ezinye indlela zokuhamba yena wasala ehlezi ebhasini.
“UClever yikho lapho athatha khona ithuba wasemdonsela emuva kwebhasi wamdlwengula kanye engazivikelanga. Ibhasi ithe isilungile baqhubeka ngohambo,” kutsho uNkszn Dube.
Isikhulumi samapholisa koBulawayo uInspector Abednico Ncube ebuzwa ngodaba uthe solufikile ehofisini yakhe.
“Sichwayisisa udaba lwendoda edlwengule umntwana ebhasini. Njengamapholisa sibonga uzulu ngokusiphathisa ngembiko eyenze senelisa ukubopha isephula mthetho lesi.
“Sicela uzulu aziphathe kuhle njalo abe lobuntu kusukela kubokhondekitha bamabhasi ngoba bangabazali nxa behamba labantwana abancane,” kuphetha uInsp Ncube.
Online Reporter