admin
Thokozile Mbedzi
ZILOKHU zinkemile izakhamizi zesigabeni seGandiwa eGokwe ngaphansi kwenduna uNemangwe ngemva kokuba omunye umfana oleminyaka engu-14 ekhabe omunye ole-15 amaphambili wafa bedlala.
Abafana laba babelusile lapho abaqala khona umdlalo wokukhabana.
Kuzwakale ukuba bakhethana baba ngamaqembu amabili. Kwathi omunye owelinye iqembu wasekhaba uTinashe Shumba wedlula emhlabeni.
Ekhuluma lentatheli kaMthunywa uMnumzana Benjamini Moyo uthe babone into yamehlo.
“Simangele silapha, abafana laba babesekweluseni baze baqale umdlalo wabo wokukhabana bengamaqembu.
“UTinashe elokhu edlala labanye omunye owelinye iqembu wasemkhaba amaphambili wahle wasuka egangeni wayangakibo ngoba esesizwa ubuhlungu.
“Ekufikeni kwakhe ngakibo watshela uyisekazi wakhe okwenzakeleyo wazama ukumphathisa ngayelakho ngekhaya kodwa ebusuku sebelele umkhuhlane wamkhulela wedlula emhlabeni.
“Njengesigaba sikhakhamele silapha ngoba abantwana laba babezidlalela Okusuka kusididanise ingqondo yikuthi kwangena moya bani kuze kwehle ingozi engaka ,” kulandisa uMnu Moyo.
Isikhulumi samapholisa esabelweni seMidlands uEmmanuel Mahoko ebuzwa ngodaba lolu uthe solufikile ehofisiyni yakhe.
“Udaba lomfana okhatshwe ngomunye bedlala solufikile ehofisini yethu ngakho sixwayisa uzulu ukuba kakhangele abantwana ngaso sonke isikhathi nxa bedlala,” kuphetha ulnsp Mahoko.
Online Reporter