KUBULEWE umuntu oyedwa osolwa ngokuhlasela ehlome ngezikhali, kwathi abanye ababili babotshwa ngemva kokudubulana lamapholisa eNorwood, koBulawayo, ekuseni ngoLwesibili.
Abasolwa laba abathathu bebelandelwa ngamapholisa ngoba besolwa ngamacala amahlanu okuhlasela ehlome ngezikhali, enziwe phakathi kwamalanga amabili kuphela.
Isikhulumi samapholisa eZimbabwe Republic Police (ZRP), uCommissioner Paul Nyathi, uthe abasolwa laba babehlome ngamabhemba, amahloka kanye lengqamu ngesikhathi besenza ubugebengu lobu.
“IZimbabwe Republic Police iqinisekisa ukubotshwa kwabasolwa ababili emacaleni okuhlasela, uAustin Nkomazana (23) loNkosikhona Ndlovu (23), kanye lokufa komunye wabo, uAverage Ndlovu (23), obizwa ngokuthi nguSaAaron, kulandela ukudubulana lamapholisa eNorwood, koBulawayo.
“Abasolwa laba babelandelwa ngamapholisa mayelana ngamacala amahlanu okuhlasela enzakala eMguza mhlaka 18 lo-19 Mfumfu 2026,” kutsho uCommissioner Nyathi.
Kwelinye lamacala la amahlanu, izigilamkhuba lezi zahlasela owesifazane labantwabakhe abathathu emzini wabo eMguza ekuseni ngoLwesibili.
“Behlome ngamabhemba, amahloka kanye lengqamu, izigebengu lezi zahlasela owesifazane labantwabakhe abathathu emzini wabo eMguza, zathatha imali engange-US$2 000 kanye lezinye impahla ezilinganiselwa ku-US$2 460,” kutsho uCommissioner Nyathi.Uthe kwesinye isehlakalo esenzakala mhlaka 18 Mfumfu, abasolwa laba bagqekeza endlini kamamangala bamtshontshela imali engange-US$300.
Ngemva kwalokho babaleka ngemota kamamangala yohlobo lweHonda Fit.
UCommissioner Nyathi uthe imota le yatshiywa ngemva kokuba kungozi.
“Amapholisa aqala ngokudubula emoyeni exwayisa abetheswacala, kodwa baqhubeka besondela kuwo, okwabangela ukuthi amapholisa avule inhlamvu.
“UAverage Ndlovu wadutshulwa esifubeni, wasegijinyiselwa esibhedlela se-United Bulawayo Hospitals, lapho afike watholakala esefile,” kutsho uCommissioner Nyathi.
Uthe abanye abasolwa, uNkomazana loNdlovu, babotshwa ngemva kwalokho.
“IZimbabwe Republic Police ixwayisa amaqembu ezigebengu kanye labantu abenza ubugebengu obulodlakela ukuthi amapholisa awasoze azihlalele abukele nxa behlaselwa ngesikhathi besenza umsebenzi wabo osemthethweni.
“Loba ngubani ozama ukuhlasela amapholisa uzaphendulwa ngendlela evunyelwa ngumthetho njalo okuhambelana lobukhulu bokuhlasela akwenzileyo,” kutsho uCommissioner Nyathi.
