admin
Cornelius Luphahla
KUZABE kusindwe ngobethole eNational Gallery koBulawayo lapho okuzadibana khona amaqembu ezomculo wesintu atshiyeneyo kuSecond Edition of International Explosive lapho okuyabe kujabulwa kuze kutsheke ibhetshu endodeni.
Umkhosi lo uzakuba khona kuviki ezayo mhlaka 17 Nhlangula lapho okuzabe kulamaqembu agoqela iSekunjalo MaAfrica, Iyasa, Ukukhanya Kwezwe, Imbongintshantshaza, ISnipers, kanye lamanye amaqembu ezesintu atshiyeneyo ngenhloso yokuvuselela ubuzwe bakoMthwakazi.
Kubikwa umkhosi lo uzaqala ngehola lika 5 ntambama kuze kuyelamula ukukhathala kwabantu njengoba nje kuyabe kuhlangene ingcitshi kwezesintu ziveza ubugagu lobugabazi bazo emphakathini.
UMthunywa uxhumane loMholi weqembu leSekunjalo Ma-Africa uArnold Ndebele waveza ukuthi umkhosi lo bawenza okwesibili njalo bancediswa ngamanye amaqembu omculo wesintu atshiyeneyo ngenjongo yokuvuselela isintu.
“Umkhosi ofana lalo esizawenza sike sawenza njalo kumnyaka ophelileyo ngakho lo uzakuba ngowesibili ngenhloso yokujabulisa uzulu kanye lokuvuselela amasiko lesizwe sikaMthwakazi.
“Ngalokhu umkhosi lo siwenza nje sincediswa ngamaqembu atshiyeneyo agoqela i-Iyasa, Ukukhanya kwezwe kanye lamanye.
“Okunye njalo njengeqembu elidume ngezimnandi sizaphakulela uzulu ezimnandi ukwedlula lokhu abasazi ngakho ngoba lelolanga kuzabe kuguga othandayo kuphela kugidwa imigido yesiNtu etshiyeneyo,” kutsho uAnorld Ndebele.
Imbongintshantshaza omunye wabaculi abazabe bekhona emkhosini lo ubikele intatheli ukuthi emkhosini lo uzabe ehlabela ezwisa abantu ingoma zakhe ezintsha kanye lenkondlo.
“Emkhosini lo ngizaphakululela uzulu indlikizane yengoma equkethe iqiniso elingaqungwanga ngezokuvuselelwa kwezamasiko kaMthwakazi. Lokhu kungenxa yokuthi inengi labantu selilahlekelwe ngamasiko alo ngakho ngizalikhumbuza ngokuhlabela uluju lwengoma lokulintshantshazela umhluzi wenkondlo zesintu ezimnandi.
“Okunye njalo ngizakhuthaza ontanga ukuthi babambelele emasikweni akwabo badele amasiko ezinye izizwe ukuze bazazi ukuthi bangobani,” kuphetha imbongintshantshaza.
Online Reporter