Brandon Moyo
INTSHANTSHU zanyakenye kuBulawayo Metropolitan Rugby Football Board (BMRFB) i-Old Miltonians (OMs) leqembu leMatabeleland Warriors zinqobe kuhle ngempelaviki edluleyo, njalo zikhangelelwe ukuthi zingqikilane ngoMgqibelo.
I-OMs isesiqongweni sengalane kulandela ukubhuqa iWestern Suburbs Panthers nge 60-27.
Iqembu leli seliqede imidlalo eyisitshiya galombili linganqotshwa kulisizini.
Abafana beMatabeleland Warriors banqobe iHighlanders nge 56-0.
IMatabeleland Warriors le-Old Miltonians zitshiyane ngemiklomelo emibili.I-OMs ilemiklomelo engu-39, kuthi amaWarriors ale-37.
Kumdlalo wazo zombili ngempelaviki, nxa iOMS inganqoba, izahle ihambe lawo umkhankaso.
AmaWarriors enganqoba, azahle athathe indawo esiqongweni.
Kweminye imidlalo, iMahogany Bulls inqoba okwesithathu kulisizini itshaya iBulldogs 22-10. Ngempelaviki iMahogany Bulls izadlala leHighlanders, kuthi iWestern Suburbs Panthers idibane leBulldogs.
Kuhlandla labesifazane, amaWarriors akhokhela ingalane anqobe iPanthers 14-5. IHighlanders itshaye iLions 37-0.
