shloboe boe
Thokozile Mbedzi
AMAPHOLISA esabelweni seMatabeleland South adinga amadoda amabili angabangane bomunye osedlule emhlabeni otholakale egwazwe umzimba wonke.
Kubikwa abetheswacala ababili lalo osengumuyi babenatha bonke utshwala endaweni yamabhizimisi yeMthwakazi eFilabusi ngezikhathi zekuseni, kuviki ephelileyo.
Isikhulumi samapholisa esabelweni seMatabeleland South uInspector Loveness Mangena uthe badinga amadoda amabili angabangane okubikwa ukuba ayenatha lalo osengumuyi owatholakala exhonxwe ngegqamu umzimba wonke okuyikho okwabangela ukufa kwakhe.
Kukhanya ababili laba sebedale icala leli, batshiya lo osengumuyi ethe daca badliwa ngumswenya njalo akukaziwa ukuthi bangaphi.
“Sidinga amadoda amabili abonakale ngezikhathi zekuseni enatha lendoda le engasekho. Ekunatheni kwabo kwaba lokuxabana bagwaza kubi osedlule umzimba wonke qede bafulathela.
“Ongasekho wabonwa ngamapholisa engasakhulumi bamgijimisela esibhedlela seFilabusi kodwa ngokusweleka kwenhlanhla wafa,” kutsho uInsp Mangena.
Uthe lo osedlule ubengela sithupha loba okunye okuveza ukuthi ungubani lokuthi uvela ngaphi.
“Amapholisa acela uzulu ukuba labo abangabe belolwazi ukuthi bangaphi abadala lelicala bazise amapholisa aseduzane ukuze bafinyelelwe yingalo yomthetho,” kuphetha uInsp Mangena.
Online Reporter