Online Reporter
Ethel Ncube
IMULI yakoNkomazana koPhulula eMbembesi eLupane isebuhlungwini ngemva kokulahlekelwa ngelinye ilunga lemuli ekuqaleni kukaMbimbitho kubangwa umentshisi.
Umuyi uLuka Nkomazana kubikwa watshaywa ngesitina nguFrancis Trust emncitshe umentshisi ezitolo wafela esibhedlela seSt Luke’s eLupane.
Intatheli ukhulume lelunga lomdeni wakoNkomazana elibike ukuba amapholisa lokhu edinga umetheswacala.
“Sehlelwa liyezi elimnyama, ilunga lemuli yangakithi uLuka watshaywa ngesitina ekhanda nguFrancis ezitolo samthwalela esibhedlela wafika wedlula emhlabeni. Siyimuli yakoNkomazana siyamdinga uFrancis Trust ngoba asikabonani laye lokhe kwenzakala isehlakalo lesi. Kulodletshana lokuthi wachapha uNgulukudela waya eGoli.
“Sicela ozambona azise amapholisa aseduzane laye kumbe asithinte lapha 0771375822. Sibuhlungu singumdeni ngesenzo lesi,” kubika ilunga lemuli leli.
Intatheli ibuye yaxhumana lesikhulumi samapholisa eMatabeleland North uInspector Glory Banda ovumileyo ukuthi indaba le isezandleni zamapholisa.
“Sichwayisisa udaba lapho uLuka Nkomazana atshaywa ngesitina kubangwa umentshisi nguFrancis Trust. Sicela uzulu asincedise ukubamba umetheswacala. Isitina esatshaya umuyi sikhona sigciniwe emapholiseni yiso esizasentshenziswa njengobufakazi emthethwandaba nxa umetheswacala angatholakala,” kuphetha uInsp Banda.
