Online Reporter
Nkosilathi Sibanda
UMDLALI weHighlanders u-Andrew Mbeba uthe uyawamukela umsebenzi awetheswe ngabaqeqetshi ukuthi abe ngukaputeni, ngakho ufuna ukukhuthaza abanye abadlali ukuthi basebenze ndawonye ukuze iqembu liphumelele.
UMbeba ukhulume lokhu kumbuthano phakathi komqeqetshi uKelvin Kaindu lentatheli zemidlalo koBulawayo ngoLwesine.
Umbuthano lo, owamaviki wonke, ubugxile kumalungiselelo eqembu kumdlalo wayo weCastle Lager Premiers Soccer League leGreenFuel ozakuba khona eGreenFuel Arena ngoMgqibelo.
UMbeba, osephiwe ibhanti likakaputeni kumidlalo emibili edluleyo, uthe akufunayo yikuthi akhuze abadlali ababambeneyo, ngoba kumele badlale beliqembu linye.
“Ngumlandu engiwuphiwe ngabaqeqetshi enkundleni yokudlala. Njengoba nginikezwe leyo ndima, engikufunayo yikuthi iqembu liphumelele.
“Ayisikho nje ukuba ngukaputeni kuphela, kumayelana ngokusebenza kweqembu lokusebenza nzima.
“Akula okungibandezelayo. Eqinisweni kunginikeze ukuzimisela lenkuthazo lokudlala kuhle ukuthi sifinyelele phezulu. Ukuba ngukaputeni welinye lamakilabhu amakhulu eZimbabwe kuyimpumelelo enkulu, ngakho konke kumayelana lokukhuthazana,” kutsho uMbeba.
