Online Reporter
YiNtatheli kaMthunywa
KUDABA olwethusayo amapholisa asebike ukuthi kufe izigelekeqe eziyisithupha kulandela ukudubulana phakathi kwawo lezigelekeqe lezi emgwaqweni wakoBulawayo leVictoria Falls ngoLwesibili ekuseni phakathi kwehola lesibili lelesine.
Kubikwa ukuthi izigelekeqe lezi zitshone ziqaphe izisebenzi zesitolo seYoung Money General Dealer Shop eNsuza ngelihlo lokhozi.
Kubikwa izigelekeqe lezi zihlasele izisebenzi ezimbili zihlome ngemibhobho yohlobo lwama-pistol, ingqamu kunye lamahloka. Zibuye zazibopha izandla ngentambo zamagetsi andubana zibavale ubuso ngengubo zathi zifuna igolide kunye lemali.
Izigelekeqe lezi zikhwathaze isitolo sonke zathatha imali, ukudla okutshiyeneyo, i-48 volts lithium battery, i-invertor le-amplifier kanye letanka yegasi labomakhalekhukhwini.
Bahlohlele impahla lezi emoteni akade behamba ngayo yohlobo lweHonda Fit elenombolo ezithi AEY 4843 badliwa ngumnyama.
Kubikwa omunye umamangala ubikele umqhatshi ngesehlakalo lesi ophange wazisa amapholisa.
Isikhulumi samapholisa elizweni uAssistant Commisssioner Paul Nyathi ugcizelele ngesehlakalo lesi kusitatimende sakhe sebulenjini kunkundla ye-X eyayisaziwa ngokuthi yiTwitter.
“Amapholisa enelise ukunanzelela imota le isondela ku-tollgate. Abacuphi balaya abetheswacala ukuthi bame kodwa bona bahle bathela ngezinhlamvu okubangele ukuthi baqale ukudubulana.
“Izigelekeqe lezi zitshaye insimbi evalela izimota andubana zibotshwe,” kutsho uAsst Comm Nyathi.
Kubikwa abayisithupha laba bathwalelwe esibhedlela se-United Bulawayo Hospitals (UBH) lapho abafike kwathiwa sebedlule emhlabeni.
Uthe amapholisa athole imibhobho emibili, kanye lezinye impahla ebezitshontshwe esitolo seNsuza.
“Njengamapholisa sifuna ukugcizelela ukuthi kasibuyeli emuva ekulwisaneni lobugebengu elizweni,” kuphetha uAsst Insp Nyathi.
