Umlingisi wodumo kuZalo usesidla imbuya ngoluthi

YIZE uGlen Gabela eyinkakha yomlingisi osehlonitshwa umhlaba wonke ngamagalelo akhe emidlalweni yethelevishini lasemafilimini kodwa usexotsha ikati eziko, ngesibonelelo sikahulumende sezaguga.

UGabela, odume kakhulu enguMfundisi Melusi Mdletshe kuZalo, uqale ukwaziwa endimeni yokulingisa edlala emdlalweni wethelevishini owawuzigcawugcawu othi Shaka Zulu ngo-1986. Ukuvelela kule filimu kwamenza wagcina eselingisa efilimini ethi Okavango (1989), Warriors From Hell (1990), Guns of Honour (1994), The Ghost and The Darkness (1996), Soldiers or the Rock (2003), Red Dust (2004), The Good Fight (2006) nethi Score (2006).

Ubuye walingisa kuGenerations, Isidingo, Backstage, Justice For All, Yizo Yizo, Soul Buddyz, My Brother’s Keeper, Jacob’s Cross, Remix, Erfsonders, Doubt, Hopeville, Heartlines, Intersexions, Izingane Zobaba, Zolile neMolo Fish. Phezu kwala mava, uGabela uthi uze wafaka isicelo sempetsheni yokuguga ngenxa yokuthi ubengasazi ukuthi uzothathani ahlanganise lani ukuze alwe lenkemane.

Egonyuluka kuThe Voice with Palesa kuYouTube, uGabela uthe usizi lwakhe lwaqala mhlazane ijazi ligcwala umoya kuye kuZalo.

Uthe wakhonjwa indlela kuZalo ekubeni wayetshelwe ukuthi wayezalingisa kulumdlalo ngokugcwele kusukela kuSeason 3.
Uthe watshaqeka kwaphela lasozwanini ngolunye usuku ebizelwa ehhovisi maqede watshelwa emehlweni ukuthi ligqabukile igoda phakathi kwakhe lalo mdlalo.

“Kwathiwa ngixotshwa ngoba ababhali babengasazi ukuthi benzenjani ngendawo yami.”
Uthe kusukela lapho impilo yakhe ayiphindanga yafana lakuqala njengoba adlelwa umuzi wakhe owawuseMdloti kanye lemota ayehamba ngayo.

“Ngenxa yalokho, umntanami wentombazane engangimondla ngamgcina ngo-2018.”
Uthe akazi unina wamtshelani ngoba wayengasamfuni lalapho ehambe khona.

Eqhuba uGabela uthe okubuhlungu yikuthi lonina wendodakazi yakhe usadlula emhlabeni ekubeni babengakalulungisi lolu daba.

“Ngikhuluma nje ngihlala ngedwa. Uma kungenzeka ngidlule emhlabeni, isidumbu sami siyotholakala sesabola kudala ngoba ngihlale ngizivalele endlini.”

Kwenzeka lokhu nje imidlalo abelingisa kuyo uGabela isasakazwa eziteshini zethelevishini, laye usavezwa. Uthe abadidiyeli bemidlalo lamafilimu babuye bengabilalo iqiniso.

Uthe lakuShaka Zulu wagitsheliswa ibhanoyi kusaqotshwa kodwa kuthe sekuphothuliwe kwathiwa akabuyele eGoli ngebhasi. LeR40 000 ayethenjiswe yona uGabela uthe akabange esawunuka kodwa wakhokhelwa uR7 000 kuphela. — Isolezwe

Related Posts

IHerentals ibusa kuzicoco ngoNkwenkwezi

Nkosilathi Sibanda IQEMBU leHerentals College liqhubeke ngokutshengisa ukuthi selingelinye lamaqembu alamandla kuCastle Lager Premier Soccer League ngemva kokuba umqeqetshi walo uCelestino Benza lomdlali uRalph Makanyara Kawondera bethole imiklomelo kaNkwenkwezi. UBenza…

Inkawu yemali icela ukuya emacansini lomniniyo . . . usiphatheleni unikela inkawu ayisebenzisa ‘ukubutha’ imali kwabanye

Gibson Mhaka KULEZINSUKU ilokitshi leCowdray Park koBulawayo seliphenduke laba yindawo egcwele indaba ezimangalisayo ngemva kokuba omunye usiphatheleni eveze inkawu athe isimhlukumeza ngemva kweminyaka eyisebenzisa ukuthathela abanye imali zabo. Indoda le,…

Leave a Reply

Your email address will not be published. Required fields are marked *

×
×