admin
Thokozile Mbedzi
AMAPHOLISA abemisa izimota emgwaqweni weMasvingo-Beitbridge adubule indoda eyodwa ebihamba lamanye ayisithupha kulandela ukwala ukumisa imota ukuze ihlolwe.
Isehlakalo lesi senzakale ngoLwesibili kuyonale iviki.
Amadoda la, uBrian Shandike, Ushe Tasara, Silent Tasara labanye babo ababehamba ngemota yohlobo lweMercedes Benz sprinter athe efika emapholiseni ayala ukumiswa ngoba esesaba ukuba athwele impahla ezingekho emthethweni.
Kubikwa amapholisa azama ukubamisa kodwa bala okwabangela ukuthi bacine bedubula uBrian Tasara osesibhedlela.
Amapholisa azama ukulwisana labo efuna babuyele e-border ngoba bengela maphepha atshengisa imvumo yokudlula lempahla lezo.
Ekhuluma lentatheli kaMthunywa omunye umfakazi oqotho uthe kube lempi eyethuse wonke umuntu ebangelwe yikungazwisisani kwamapholisa labantu laba ababehamba ngemota.
Kubikwa abantu laba babanga umsindo omkhulu njalo kungathi babefuna ukuhlasela amapholisa okuyikho okwacina kubangela ukuthi kudutshulwe omunye wabo unyawo.
“Ngikhuluma nje omunye wamadoda la usesibhedlela. Sithwele nzima ngabantu ababuya lapha bezokwenza ukuganga esigabeni sethu, kunje sebengcolise ibizo lendawo yethu,” kulandisa umfakazi oqotho.
Isikhulumi samapholisa uAssistant Commissioner Paul Nyathi ebuzwa ngodaba lolu uvumile wathi solufikile ewofisini yakhe njalo uzulu akumelanga alwisane lamapholisa ngoba kulicala elikhulu.
“Udaba lwamadoda ayisikhombisa solufikile ewofisini yethu njalo omunye wabo udutshulwe ngamapholisa ngemva kokubalimukisa kodwa bona baqhubeka besiya phambili belwisana lamapholisa.
“Njengamapholisa sithanda ukuxwayisa uzulu ukuthi ukulwisana lamapholisa kulicala elikhulu kakhulu lokungenisa impahla elizweni okungekho emthethweni lakho kulicala elifanayo. Izephulamthetho zonke lezi zisezandleni zamapholisa,” kuphetha uAsst Commissioner Nyathi.
Online Reporter