admin
AZILAMATHE izakhamizi zesigabeni seGovan Mbeki ePort Elizabeth ngemva kokuba elinye inina lidutshulwe kanye labantwabalo ababili lafa.
Kubikwa uNomathemba Booi (35) labantwabakhe ababili uNoluvuyo (19) obesanda kuqala umsebenzi kanye loAsamahle (15) obefunda uGiredi 9 badutshulwa yizigebengu zababulala ebusuku belele.
Intombi yomntaka-muyi ibikele intatheli ukuthi bona babelele kwenye indlu ngethuba kudutshulwa uninazala bezwa ngomsindo.
“Thina sasilele kudutshulwa umamazala sezwa umsindo omkhulu ngacabanga ukuthi kungabe kulomuntu ojikele ilitshe endlini. Ngemva kwalokho sezwa umsindo wokudubuka kombhobho,” kutsho intombazana le.
Uqhubekele phambili njalo wachaza ukuthi ngemva kwalokho ijaha lakhe lasuka layakhangela ukuba kwenzakaleni laphenduka lamthatha bayabikela amapholisa.
“Ngemva kwalokho ijaha lami lasuka layakhangela laphenduka langithatha lathi ngiyengena emoteni lami ngalandela. Sahamba-ke saze sayafika enkambeni yamapholisa iKwadwesi Police Station.
“Sesifikile ngambona esekhala ebikela amapholisa ukuba umama sebembulele labodadewethu. Mina angizange ngazibona izidumbu zabo ngoba amapholisa ala ukutshengisa izihlobo zabo,” kutsho intombazana le.
Izihlobo zikaNomathemba zimchaze njengomuntu owayelunge kakhulu engaxabani lomuntu. Zibuye njalo zamethula njengomama obenakekela imuli yakhe kuhle kakhulu njalo esebenza ukuthengisa ukudla eNjoli Tax Rank.
Kubikwa ekufeni kwakhe akuzange kutshontshwe lutho.
Isikhulumi samapholisa uCaptain Andre Beetge ubike ukuthi kuliqiniso ukuthi kulomama owadutshulwa ebusuku labantwabakhe ababili.
“Phakathi kwehola lika-2 lo-3 ekuseni kwatholakala umama labantwabakhe ababili befile bonke bedutshulwe amakhanda eStofile Street. Isivalo sendlu sasingabulawanga okutshengisa ukuthi kwakuvulwe ngezihluthulelo.
“Izidumbu zatholakala phakathi endlini, unina walababantwana wayelele phansi kuthi abantwana babelele embhedeni. UmntakaNomathemba oleminyaka emithathu wayengalimalanga kanye lokaNoluvuyo olenyanga ezingu 18,” kuphetha uCaptain Beetge. — Online
Online Reporter