admin
Cornelius Luphahla
NGENHLOSO yokusa idlalade lakhe ebantwini umhlabeleli olodumo womculo we-rhumba uNdux Junior useveze ukuthi kusukela mhlaka 29 ize iyephela inyanga yonale uzabe ejabulisa abalandeli bakhe abaseLupane kanye leDete.
UNdux Junior kanye lequla lakhe leBatshele Brothers bazaphakulela abalandeli laba idlalade lakhe elitsha elithi Uthando luyingozi.
“Kudlalade lami leli ngikhuthaza abantu ukuthi bananzelele emizini yabo ngoba kukhona abantu abangathembekanga kulezinsuku abangena emizini yabanye,” kuchaza uNdux.
Umculi lo oselenyanga ezimbalwa ephakamisa umculo wakhe we-rumba endaweni ezitshiyeneyo uveze ukuthi okumenze wahlela ukuvakatshela abalandeli bakhe bakulezi indawo yikuthi sekulesikhathi eside engabavakatsheli.
UNdux ubikele iphephandaba likazulu njalo ukuthi ukhangelele ukuthuthukisa umculo we-rumba.
“Lonyaka ngifuna ukuthi abantu bazi ukuthi umculo we-rumba ngumculo omnandi kakhulu njalo ophakemeyo lapha koMthwakazi. Noma nje bekhona ababengazi ukuthi umculo lo umnandi kodwa ngiyazi ukuthi mhla bewuzwa ngiwudlala bazaqala ukuwuthanda,” kutsho uNdux.
Uqhubekele phambili njalo wachaza ukuthi khathesi seqalile ukuvakatshela indawo ezehlukeneyo edlala ingoma zakhe.
“Mina njengomculi sengiqalisile ukuvakatshela indawo ezehlukeneyo ngitshayela abantu ingoma zami njalo ngisazobajabulisa okwamagama. Nginanzelele ukuthi sokulesikhathi eside ngingavakatsheli endaweni ezifana leLupane kanye leDete ngakho ngikhangelele ukuyavakatshela khona kusukela mhlaka 29 kuyonale inyanga kusiya ekupheleni kwayo,” kutsho uNdux Junior.
“Noma nje ngimenywe ngaphandle kwelizwe kweleBotswana kodwa ngibone kungcono ukuba ngiqale ngivakatshele uzulu wakuleli ngimjabulise ukuze abone ukuthi lokhu sisamkhumbula.
UNdux Junior uphethe ngokuthembisa abalandeli bakhe ukuthi bahlale bethiye indlebe ngoba uzabaphakululela elinye idlalade umnyaka ungakapheli.
Online Reporter