Online Reporter
Ethel Ncube
KWEHLE iyezi elimnyama ngoLwesine kumaviki asanda kwedlula, kusenzakala ingozi ebuhlungu eMpinda, ngaphansi kwenduna Tshugulu, eNkayi lapho okutshone abantu ababili bezama ukukhipha igabha lamanzi emthonjeni.
Abatshonayo nguSiyabonga Dube (11) loErnest Ncube (43)
Kubikwa ukuba uProsper Dube, owesilisa oleminyaka engu-29, wayezama ukuthola igabha ayelisebenzisa ukudonsa amanzi emthonjeni otshonayo ongaba ngamamitha angu-15 ngesikhathi kusenzakala lingozi.
Kubikwa umfana oleminyaka engu-11, uSiyabonga Sibanda, wazinikela ukuthi angene emthonjeni ukuze akhiphe
igabha. Wehliswa ngentambo kodwa kukhanya waphelelwa ngumoya (suffocation) ephakathi waze wedlula emhlabeni.
Ngokubona lokhu, omakhelwane baqoqana ukuze bazame ukusiza. UErnest Ncube, owesilisa oleminyaka engu-43, laye wangena emthonjeni ukuze azame ukukhipha isidumbu sika Siyabonga laye wafika waphelelwa ngumoya ephakathi waze wafa.
Amapholisa afika endaweni le, kanye lomphakathi, benelisa ukukhipha imizimba yabo.
Izidumbu zathwalwa zaya eNkayi District Hospital, zadluliselwa eUnited Bulawayo Hospitals ukuze kwenziwe i-post-mortem.
Intatheli ixhumane lesikhulumi samapholisa eMatabeleland North uInspector Glory Banda oveze ukuba indaba enjalo yenzakala.
“Silusizi ngokwehlela imuli lezi ukuthi balahlekelwe yizihlobo. Siphinde sikhuthaze uzulu ukuthi angaqali ukungena endaweni ezitshonayo ezilamanzi,” kuphetha uInsp Banda.
