YiNtatheli kaMthunywa
KULABAFUNDI ababili besikolo seMabhukudwana Primary School eNkulumane, koBulawayo, akade bekuGrade 7 abadlule emhlabeni ngoLwesibili kuliviki.
Abafundi laba, umfana uBrighton lenkazana, u-Answer, bebekuGrade 7 Green lo Grade 7 Red. Omunye kubikwa ubehlala duzane lenkamba yamapholisa eNkulumane, omunye elokitshini leTshabalala.
Abafakazi abaqotho bathe omunye ubhubhele eMasvingo, omunye koBulawayo. Bobabili bebegula njalo behluleka ukuqeda ukubhala imihloliso kaGrade 7.
Loba kungachazwangwa sobala imbangela yokwedlula kwabo emhlabeni, amapholisa abikele iphephandaba likazulu ukuthi akula okubi okucatshangelwayo.
Amapholisa, ngemva kokuxhumana lentatheli kaMthunywa, ngoLwesithathu avakatshele esikolo lesi ukuyahlola lokuqinisekisa udaba lokufa kwabafundi laba, kwatholakala ukuthi liqiniso.
Isikhulumi samapholisa koBulawayo u-Inspector Nomalanga Msebele uthe ithimba lamapholisa athunywe esikolo afice umphathisikolo engekho.
“Udaba siluzwile njalo sithumele amapholisa ukuthi ayedingisisa ngodaba. Akukho okubi okucatshangelwayo ngokufa kwabafundi laba ngoba kukhanya kungokwemvelo,” kutsho u-Inspector Msebele.
Ukufa kwabafundi laba kuqale ukukhulunywa ngakho enkundleni zokuxhumana ngoLwesibili. Abanye baveze umbono wokuthi kungenzeka ukuthi abafundi laba badla ukudla okuthile, kuthi abanye bathi kungenzeka ukuthi banatha amanzi angcolileyo. Kodwa, konke akuqinisekiswanga.
UKhansila wendawo le, uMmeli Moyo katholakalanga ecingweni. Imizamo njalo yokukhuluma lesikhulumi sogatsha lwezeMfundo yaphansi kuHulumende uMnumzana Taungana Ndoro, ucingol lwakhe belungangeni kwaze kwafika isikhathi sokudindwa kwephephandaba.
