admin
Thokozile Mbedzi
KULABOMAKOROKOZA ababili abafele emgodini weEmpire eFilabusi kulandela ukuhitshwa yintuthu yamahola ngoLwesibili ekuseni.
UMovus Sibanda oleminyaka engu-29 loVillage Ncube oleminyaka engu-29 abasuka koSikhobokhobo eNkayi bafele emgodini ngemva kokuhitshwa yintuthu yamahola.
Ekhuluma lentatheli kaMthunywa uMnumzana Nkosiyabo Sibanda ongumakorokoza uthe abanye babo behlelwe liyezi elimnyama ngesikhathi bengena emgodini nanko phela bangene intuthu ingakapheli phansi.
“Ngilusizi ngengozi esehleleyo lapha emsebenzini wethu. Abafowethu basuke bajaha ukungena emgodini ngoba sebejahe ukuba bahle basebenze ngoba sokusiyafika ikhefu leKhisimusi kungakho bebetshaya umgwazo wokuba bahambe emakhaya bephethe imali engcono.
“Kukhanya bathi bengena emgodini bahle bahitshwa yintuthu bafa bobabili. Kube nzima lokhu kithi ngoba ingozi le ibuye singalindele njalo sonke sisebenza ngamandla wonke ukuba siyekholisa labanye ikhefu leKhisimusi.
“Sihlala siwasebenzisa amahola kodwa lokhu okwalamhlanje asikuzwisisi ukuba bahitshwe njani abangane bethu,” kulandisa uMnu Sibanda.
Esinye isakhamuzi uNkosazana Kwanele Mathuthu uveze ukuthi yena kalankani ngendlela ababili laba abadlule ngayo emhlabeni.
“Mina kangilankani ngendlela ababili laba abadlule emhlabeni ngayo, kukhanya kulokugangelwa thize okukhona ngoba sinje imigodi yamanzi eminengi yagejwa kusetshenziswa amahola ukuze itshone kodwa kakho owafayo,” kutsho uNkszn Mathuthu.
Isikhulumi samapholisa esabelweni seMatabeleland South uInspector Philisani Ndebele uthe udaba lolu solufikile ewofisini yabo.
“Udaba lwamadoda amabili afele emgodini ngemva kokuba ehitshwe ngamahola solufikile ewofisini yethu njalo sixwayisa uzulu ukuthi atshiyane lokwemba okungekho emthethweni,” kuphetha uInsp Ndebele.
Online Reporter