admin
IKHANSILI yakoBulawayo isifake impompi zamanzi ezintsha ezizakwenza idolobho lakoBulawayo lenelise ukudonsa amanzi angaba yi-180 megalitres ngosuku nanko phela idolobho leli lifuna amanzi angaba yi-150 megalitres ngosuku.
Imitshina emitsha ikhangelele ukwethulwa ekupheleni kwenyanga.
Ikhansili itshintshe impompi ebesezindala eFernhill kanye leNcema water works ezafakwa ngomnyaka ka1973, okuyikho obesekuphambanisa ukupotshwa kwamanzi.
Impompi lezi zifakwe ngaphansi kwephurojekithi yeUS$33,6 million yeBulawayo Water and Sewerage Services Improvement Project (BWSSIP) ebisekelwa yi-African Development Bank (AfDB).
Impompi ezintsha ziyenelisa ukudonsa amanzi angaba yi-180ML ngosuku kodwa okwakhathesi ikhansili kayenelisi ukwenza lokhu ngoba kumele ilondoloze amanzi amalutshwana asemadamu.
Idolobho lakoBulawayo liphakathi kwetshe lembokodo ngenxa yodubo lwamanzi kulandela ukuvalwa kwamanye amadamu ngoba kungazange kungene amanzi amanengi ngesikhathi sokuna kwezulu kuzigaba ezimbili ezedluleyo.
I-Criterion Reservoir esebenza njengesiphephelo sanoma yikuphi ukuphazamiseka kayiselamanzi okokuqala kumbali yayo.
Ukufakwa kwemitshina emitsha yokudonsa amanzi kuyintuthuko enkulu eqinisekisa ukutholakala kwamanzi kuminyaka engu-30.
Online Reporter