admin
YiNtatheli kaMthunywa
NGEMVA kokunanzelela ukuthi abaphathi abanengi bezikolo abakwazi ukusebenzisa amakhompuyutha, ugatsha lwezemfundo luqhube uhlelo lokwethula ulwazi lokusebenzisa imitshina le kubaphathi bezikolo zesabelo seMatabeleland North kuyonale iviki.
Uhlelo lolu oluqale ngoMvulo kuyonale iviki njalo luqhutshwe eLupane luhlose ukuhlomisa abaphathi bezikolo ezitshiyeneyo kusabelo lesi ngolwazi lwamakhompuyutha ukuze bahambelane lezikhathi.
Umqondisi wezemfundo eMatabeleland North uNkosikazi Boithatelo Mnguni uchaze ukuba loluhlelo lujonge ukuhlomisa abaphathi bezikolo bonke abalesifiso sokufunda kusenzelwa ukuba bengasaleli emuva.
“Uhlelo lolu lwamakhompuyutha silwenza nje ngoba kwananzelelwa ukuthi banengi abaphathi bezikolo abangalalo ulwazi lwamakhompuyutha.
“Lokhu sikubone kumqoka ngoba kulezinsuku amakhompuyutha asetshenziswa kungatsha ezitshiyeneyo kungakho ke kuqakathekile ukuthi abaphathi njengabantu abaphethe izikolo bakwazi ukuwasebenzisa,” kutsho uNkkz Mnguni.
Lolu hlelo beludinga ukuthi umphathi munye ngamunye wesikolo abhadale imali engange $160 ukuze enelisa ukuthola izifundo zamakhopuyutha okweviki eyodwa.
Kubikwa ukuba abaphathi bebekhonona ngemali le bethi inengi kakhulu njalo abenelisi ukuyibhadala.
Lokhu kudale ukuba kube labaphathi abayingcosana nje abaphatheka kulezizifundo.
Kubikwa abogatsha lwezemfundo bacine besithi umphathi ongabe elemali engange $50 angabhadala yona abeseqedisa enye imali ngemva kwesikhathi.
Online Reporter