admin
Khanyile Ndebele
KULONTOMBAZANA welokitshini leMakokoba koBulawayo oleminyaka engu-17 okubikwa uhlaselwe yizigebengu zambamba iganyavu ngesikhathi elejaha lakhe phakathi kwamabili endaweni eyaziwa ngokuthi kuseFusini.
Umamangala okugodlwe igama lakhe kubikwa uhlaselwe mhlaka 22 Mpalakazi.
UMthunywa uzwe ukuthi umamangala wayehlezi ezitolo lejaha elileminyaka engu-16 andubana kuthutshe izigebenga ezintathu zatshaya ongumfana ngembodlela andubana zimthathele umakhalekhukhwini wakhe kodwa ngenhlanhla wenelisa ukubaleka watshiya umamangala emuva.
Isikhulumi samapholisa koBulawayo uInspector Abednico Ncube uthe amapholisa achwayisisa ngecala lokudlwengula kanye lokulimaza.
“Izigebenga lezo sezisele lontombazana lo, kubikwa omunye wazo wamtshaya ngempama wasemgwaza kathathu emlenzeni andubana amdlwengule ababili bebukele.
“Ngemva kwesikhathi umfana owayebalekile waphenduka esehamba labanye ababezosiza bafica umamangala eseqalekile bahle bamgijimisela esibhedlela,” kutsho uInsp Ncube.
Omunye wabetheswacala laba kutholakale ukuthi nguOpportunity Nkomo kukanti ababili abakaziwa.
Isikhulumi samapholisa siphethe ngokuthi uzulu kumele alandele umthetho owabekwayo wokuvinjwa kwabantu emakhaya.
“Abazali kufanele bahlale besazi indawo lapho abantwana abayabe bekhona ukuze benelise ukubavikela ezingozini.”
Online Reporter