admin
Ethel Ncube
NGENXA yokuthanda uMaGwebu kulendoda yeNtalale eGwanda edlale iKhisimusi ithoba amanxeba kulandela ukutshaywa ngesitina eqolo ngoba inathe utshwala babantu inganikwanga imvumo.
Indaba le yenzakale ngelanga leKhisimusi lapho uMnumzana George Moyo atshaywe ngesitina nguMnumzana John Sibanda kubangwa utshwala.
UMthunywa uxhumane lesinye isakhamuzi ebesikhona ngesikhathi kubangwa utshwala uMnumzana Moses Dube oveze ukuba utshwala buxabanise abantu.
“Sasizinathela uMaGwebu kwathutsha uMoyo.
Uthe esanda kuhlala nje phansi waphakamisa isikali ethi akhiphe umhawu kanti mamo usezithezele olulenkume ngoba uSibanda onguye owayethenge utshwala wahle wavela wadobha isitina wamtshaya eqolo ethi kungani enatha engacelanga.
“UMoyo laye ngokuthukuthela wasukuma wamlanda uSibanda ngezibhakela abantu bambamba ukuthi angamtshayi,” kubika uMnu Dube.
Intatheli iphinde yakhulumisana lesinye njalo isakhamuzi uMnumzana Mthabiseni Nare oveze ukuba uMoyo loSibanda batshona sebesemlonyeni yabantu.
“IKhisimusi lilanga lokutshona lizinathela likholisa labanye lisabelana elilakho kodwa omunye wakhetha ukutshaya umuntu owafika wanatha kanye kuphela,” kubika uMnu Nare.
Ekhuluma lentatheli uMnu Sibanda owatshaya omunye ngesitina uchaze ukuba yena kasakhumbuli kuhle okwenzakalayo.
“Ngingeke ngibekwazi kuhle ukuthi ngenzani ngesikhathi nginathile njalo bonke enganginatha labo ngabalanda ngabaxolisa ngemva kokungibikela ukuba ngatshaya umuntu ngesitina laye uMoyo ngamlanda ngayaxolisa,” kutsho uMnu Sibanda.
Iphephandaba likazulu liphinde laxhumana loMnu Moyo othe sebakhumisana umlotha.
“Mina wathi eqeda kungitshaya ethi yindaba nginatha utshwala bakhe ngafikelwa lulaka kodwa ngazehlisa ngalalela imibono yabantu ngamekela, yena nguye ocine engilanda ezongixolisa esithi waphambanisa sikhulumisane njengamadoda,” kuphetha uMnu Moyo.
Online Reporter