admin
Cornelius Luphahla
INHLANGANISO ekhangela ngezokulima iLivestock Production Development ibhoda esabelweni seMatabeleland North ngenhloso yokukhangelisisa ukuthi indlala yezifuyo engaba khona inganani ukuze baphume lamacebo okuvikela ukucuba kwezifuyo.
Ukuhlolisiswa kwezigaba lokhu kuqale emavikini amabili adluleyo njalo kukhangelelwe ukuthi kuphele kuyonale iviki.
UMnumzana Cosmas Muzunde onguLivestock Production Officer esabelweni seMatabeleland North ubikele intatheli ukuthi kulequla elakhethwayo kule inhlanganiso ukuba lihambe lihlolisisa ngalokhu.
“Kulequla elakhethwayo ukuba lihambe likhangela ngendubo ezihlasela abalimi njengoba izulu lingekho. Iqula leli lingamaqembu atshiyeneyo njalo lihamba indawo ezehlukeneyo ngenhloso yokuqeda masinyane.
“Elinye iqembu beliye eLupane leTsholotsho, kukanti elinye liseBubi leMguza, abanye baseNkayi, Binga kanye leHwange,” kutsho uMnu Muzunde.
UMnu Muzunde uqhubekele phambili njalo waveza ukuba kunhlolisiso le amaqula la akhangela izifuyo kanye lezilimo.
“Amaqula la sikhangelele ukuthi abuye lombiko osuthisayo ochaza ngesimo sezilimo kanye lezifuyo.
“Ezifuyweni kukhangelwa indlala ekhona kanye lokuthi indawo ezihlaselwe yindlala yiziphi njalo indlala yakhona inganani. Okunye njalo umkhankaso lo ukhangela kakhulu amapulazi amaA1 okuyiwo ahlaselwa kakhulu yindlala yezifuyo ngoba abalimi basuka bandise izifuyo ziphethe zisandela amadlelo,” kulandisa uMnu Muzunde.
“Njengoba iqula leli likhangela lezilimo lapha liyabe likhangela ukuba indawo ezihlaselwe yindlala kakhulu ekulimeni yiziphi njalo kungani zihlaselwe yindlala le. Lokhu kuqakathekile ngoba abalimi laba bayabe bezafundiswa ukuba benzeni ukuze bengaze bahlaselwa yiloluhlupho.
“Okunye njalo umkhankaso lo uqakatheke ngokuthi ngemva kokuhlolisisa lokhu impumela yakhona isiwa kuHulumende ukuze azi ukuba indlala yezifuyo leyokudla ihlasele ziphi indawo ukuze njalo abelolwazi lokuthi yiluphi usizo olufunekayo kundawo ezitshiyeneyo zelizwe,” kuphetha uMnu Muzunde.
Online Reporter