adminJohas Moyo
ZISELE zibambe owangaphansi izakhamizi zeDonjane, eKwekwe ngemva kokuba enye indoda eliPostoli ibanjwe ilentebe eyesabekayo njalo ephefumulayo ngeviki ephelileyo.
Umsolwa uTafadzwa Magwiro okucatshangelwa ukuthi angabe eleminyaka yokuzalwa engu-35 kubikwa kukhithike into yakhe le efana lexoxo kodwa ilekhanda elifana lelomuntu esikhwameni sakhe ebesiphihlika ngengcekeza.
Intatheli le ixhumane loMnumzana Mthokozisi Manyathela obike ukuthi ubekhona ngesikhathi kusenzakala linkemenkeme yendaba njalo lalamuhla ulokhu esatshaqekile.
“Esikubonileyo kuyethusa sibili ngoba nxa sihamba phandle lapha siyabe singazi ukuthi abanye abantu baphethe imithi emibi.
“Okuyinto okuwe kusuka esikhwameni sikaMagwiro bekusesabeka yikho nje abantu becabangele ukuthi mhlawumbe yintebe yakhe ayisebenzisa edinga inhlanhla. Bekulixoxo elilekhanda elifana lelomuntu, elicazimulayo njalo eligqiziswe ngobuhlalu entanyeni lasenyaweni,” kutsho uMnu Manyathela.
UMthunywa uzwe njalo ukuthi uMagwiro ngumphurofethi othandwa linengi kuleyondawo njalo udume ngokukhulekela abagulayo kanye lokumisa abesifazana. Izakhamizi zicabangela ukuthi usebenzisa intebe yakhe leyo ukwelapha abantu kanye lokuganga.
Ekhuluma ngalesisiga uMnumzana William Mthethwa uveze ukungahlaliseki emoyeni wakhe ngokuganga osekukhona ebantwini. Uphinde waveza ubumunyu ngaloludaba langabantu abahamba bephethe izinto ezesabisayo ukungaziwayo ukuthi bayabe behloseni ngazo.
“Ngafisa ukuthi ngihle ngimqede umsolwa ngaleso sikhathi ngibona intebe yakhe aganga ngayo. Into engizondisa kakhulu yikuthi uke wamisa udadewethu okwenza ngingasazwisisi ukuthi pho kamlalisanga lexoxo lakhe yini ukuthi akhulelwe, ngilokhu ngididekile lakhathesi,” kutsho uMnu Mthethwa.
Imizamo yokuxhumana lomsolwa yehlule ngoba kubikwa wahle wanyamala kuleyondawo njalo ubengela lunga lomndeni kuleyo ndawo ngoba wayelande ukuzothandazela abantu kuphela.
Online Reporter