Online Reporter
ICHICKEN Inn iyamthanda umqeqetshi wayo uJoseph “Joey” Antipas.
Ngemva kwemidlalo elitshumi, umqeqetshi lo wenelise ukunqoba umdlalo owodwa zwi. Akukaze kwenzakale lokhe iqembu leli langena kuPremier Soccer League ngesizini ka-2011.
Abalaziyo leliqembu bathe kuyadanisa njalo kuyayangisa ukukhuluma ngesimo esihlasele leliqembu. Ukubona umqeqetshi wodumo, onjengo-Antipas esadalala, kuveza ukuthi kukhona okungayisikho eqenjini. Imibuzo iyanda kubalandeli beqembu, lalabo abathanda ibhola.
U-Antipas kungabe kukhona akufukameleyo yini kumbe kaselawo amaqhinga amatsha? Nxa esafukamele, sekumele kucace ukuthi ubesalinde ukuthi abadlali bakhe benze okungcono emdlalweni.
Ulabo abadlali okwaziwayo ukuthi kabaliphumputhi ibhola. Kubadlali laba, kuloMichael Charamba, Brian Muza, Donovan Bernard, George Majika, Xolani Ndlovu, uNelson Ketala labanye abatsha abathengwe kulisizini.
Ngokuhlakanipha kuka-Antipas, okwaziwa ngumuntu wonke olandela inguqu yakuleli, kubanzima ukuthola impendulo yokuthi umqeqetshi lo wehlulwa yini. U-Antipas wathwala inkezo yeCastle Lager ngo-2015, ekuChicken Inn njalo wake waqeqetsha amaWarriors.
Pho kuhamba njani?
Bekukhangelelwe ukuthi iChicken Inn imxotshe kuliviki kodwa icabange ukuthi imnikeze elinye ithuba. Unobhala weqembu, uTavengwa Hara ubikele intatheli ye-Zimpapers Sports Hub ngoLwesibili ukuthi lokhe belethemba ku-Antipas.
“Sicabanga ukuthi asikho isidingo sokuthi sethuke. Yebo, asizange sibe lesiqalo esihle kodwa sithi umsebenzi uyaqhubeka.
“Kasiqalanga kuhle kodwa kuyingxenye yomdlalo. Silethemba elikhulu lokuthola impumela engcono. Silabadlali abalethalenta njalo labaqeqetshi bethu siyabathemba,” nguHara lo.
NgeSonto edluleyo iChicken Inn inqotshwe 1-0 ngabafana abachinsa ukudlala kuPSL, iMWOS.
Kumidlalo edluleyo, amaGamecocks ebesehluleka ukuthi ahlangane, agcine ibhola lokuvimba igedi. Lapho ebihlohlwa khona, yehluleke lokuthi iphendule.
Ngemva komdlalo leMWOS, akuzange kube lokuzwanana phakathi kwabaqeqetshi labadlali. Umsekeli ka-Antipas, uFungai “Tostao” Kwashi ugcone onompembe, esithi yibo abatshintshe isimo somdlalo wabo beleMWOS.
Umthwalo uyanda kumqeqetshi u-Antipas. Ukuqala isizini kancane kuyinto eyodwa, kodwa ukuqhubeka ngokunqotshwa kudala ukuthi iChicken Inn icine isidlalela ukuthi ingaphumi kuligi.
