Online Reporter
YiNtatheli kaMthunywa
NXA uPapa olandelayo engaba ngowe-Africa, uzabe engowokuqala kubandla leRoman Catholic.
Amakholwa ebandla leRoma ase-Africa bacabanga ukuthi sekuyisikhathi sokuthi ibandla libe loPapa odabuka kulelizwekazi.
NgoLwesithathu oKhadinali abakhethiweyo abayi-133 bangene eSistine Chapel beqala ukhetho lukaPapa, ozangena esikhundleni sikaPapa uFrancis, odlule emhlabeni ngoMabasa.
Yibaphi abafundisi abangangena kukhetho lukaPapa?
Kulabo Khadinali abathathu abadabuka e-Africa abangangena kukhetho, uRobert Sarah oweGuinea, Peter Turkson oweGhana futhi loFridolin Ambongo oweCongo.
Nxa omunye wabo engakhethwa, engaba nguPapa wakuqala owase-Africa eminyakeni engaphezu kwe-1 500. Imbali le yenza abanengi e-Africa balangazelele utshintsho ebandleni, kodwa lincane ithemba abalalo.
UKhadinali Francis Arinze oweNigeria wake waba seduzane lokukhethwa ngo-2005, kungena uPapa uBenedict XVI.
Ibandla leRoma lilamakholwa amanengi ase-Africa njalo kukhetho lukaPapa omutsha, kulamaKhadinali afika alitshumi lanhlanu avule amehlo esihlalweni.
UKhadinali Sarah nguye ongakhokhela kulolukhetho, ngokuphuma kumibona yamaKhatholika.
“Kithi, akulandaba ukuthi ungumAfrika, umhlophe, loba umnyama. Okubalulekileyo ukuba nguPapa olungileyo, ongcwele ongahlanganisa amaKhatholika emhlabeni wonke,” kutsho uLuka Lawrence Ndenge oweSouth Sudan.
UBishop Tesfaselassie Medhin, owe-Ethiopian uthe:
“Kimi, ukuba lomAfrika otshisekayo, ozinikeleyo futhi olothando lamaKhatholika kubaluleke kakhulu.”
U-Emily Mwaka, oliKhatholika, uthe akathandi ukucabangela ngoPapa olandelayo, ikakhulukazi ngombala wesikhumba sakhe.
