admin
Cornelius Luphahla
IZIZALWANE zakoMthwakazi seziqalile ukulungiselela usuku olukhulu lokukhunjulwa kwamaqhawe ebutho lenkosi uLobhengula awebutho leMbizo.
Umkhosi lo uhlelwe yinhlanganiso ethiwa nguMhlahlo Wesizwe sikaMzilikazi njalo uzakuba khona mhlaka 5 Lwezi lapho okumenywa khona umuntu wonke wakoMthwakazi ukuthi azokhumbula ibutho leMbizo yodumo elaqedwa ngabaMhlophe inkosi yanyamalala.
Ekhuluma loMthunywa umsekeli kamgcinisihlalo wenhlanganiso yoMhlahlo Wesizwe sikaMzilikazi uMnumzana Greater Sibanda uthe umkhosi lo ujonge ukukhumbuza abantu ngembali yesizwe kanye lokuvuselelwa kwezamasiko.
“Umkhosi lo uzaqala ekuseni ngo-9 uze uyephela ntambama ngo-5 lapho abantu abazachitheka khona. Injongo yomkhosi yikukhumbuza izizalwane zakoMthwakazi ngembali yesizwe egoqela izimpi ezaliwa ngokhokho besilwa labaMhlophe. Lokhu kuzavezwa ngokubaliswa imbali yempi phakathi kwebutho leMbizo kanye lelikaJameson sibuye njalo sichaze ngokunyamalala kwenkosi uLobhengula.
Esikukhangeleleyo yikuthi sivuselele njalo ezamasiko ngoba okunye njalo umkhosi lo ujonge ukuvuselela amasiko akwethu ngoba kuzabe kugidwa yonke imigido yakoMthwakazi,” kutsho uMnu Sibanda.
Unobhala wenhlanganiso yoMhlahlo Wesizwe sikaMzilikazi uDokotela Zwane ubikele uMthunywa ukuthi bakhuthaza uzulu wonke ukuthi abekhona emkhosini lo ukuze avuselele ubuzwe bakhe.
“Sikhuthaza uzulu wonke jikelele ukuthi abekhona emkhosini lo ukuze avuselele ubuzwe bakhe ngoba ukuphatheka emkhosini lo kuzamnceda ukuthi abekwazi lapho okwaphelela khona ibutho lenkosi kanye lesizatho sokunyamalala kwenkosi.
“Sikhuthaza njalo labantwana abasakhulayo ukuthi baphatheke emkhosini lo ngoba yibo insika yesizwe ngakho kufanele bawazi amasiko babuye bawagcine kuhle. Nxa bengasaphethekanga emikhosini efana lalo kuzakuba nzima ukuthi bafunde amasiko akwabo bazakhula bengazazi ukuthi bangobani abadabuka ngaphi,” kuphetha uZwane.
Online Reporter