admin
Cornelius Luphahla
LOKHE zikhuza umhlola izakhamizi zeSt Luke’s eLupane ngemva kokuba enye indoda engaphilanga kuhle engqondweni igamule omunye umfundi ngehloka wafa, uMthunywa uyakuveza lokhu lamhlanje.
Isehlakalo lesi senzakale ngoLwesithathu ngeviki ephelileyo ntambama.
Kubikwa umuyi uMisumuzi Mpofu (17) obefunda uFomu 4 eZwangendaba Secondary wehlelwa ngamashwa la evela esikolo ehamba labangane bakhe.
Kubikwa umetheswacala uSifiso Jehovah Jubane (33) waqonda uMpofu wafika wamhlahlela ngehloka ekhanda.
UMthunywa ukhulumisane loMnumzana Thamsanqa Sibanda owayekhona mhla indoda le igamula umfundi walandisa ngokuganyulwa komfundi lo.
“Ngangihlezi ezitolo ngabona uSifiso elanda abantwana besikolo ethwele ihloka. Bathe bembona babaleka kodwa wayeseseduzane labo kakhulu wasegamula uMisumuzi wawela phansi.
“Esenze lokhu uSifiso wasuka wayazihlalela ngaphansi kwesihlahla engagqize qhakala.
“Kuthe kunjalo sathatha umfana lo samusa esibhedlela seSt Luke’s lapho abafika bamdlulisela esibhedlela seMpilo koBulawayo,” kutsho uMnu Sibanda.
Kubikwa ngemva kokuthwalelwa kukaMisumuzi esibhedlela izakhamizi zabikela amapholisa abopha uJubane.
Ekhuluma loMthunywa uMnumzana Qhubekani Dlodlo uthe uzwa ubuhlungu kakhulu ngesenzo sikaJubane njalo usola kakhulu amapholisa ngoba uyise wawabikela kanengi ukuthi ambambise amuse esibhedlela.
“Mina ngizwa ubuhlungu kakhulu ngesenzo esenziwe nguSifiso esokubulala umntwana wesikolo. Khathesi abanye abantwana besikolo sebefunda besesaba. Laba abancane abasafuni lokuya esikolo. Ngikhuluma nje mina ngilomntwana ofuna uECD khathesi sesesaba ukuya esikolo uthi uzaganyulwa.
“Okunye ngisola amapholisa ngoba uyise kaSifiso wawabikela kwaze kwaba kathathu ukuthi umntanakhe usangene, kababuye bazomncedisa ukumbamba amuse esibhedlela ngoba uzalimaza abantu. Isimanga yikuthi abazange babuye babelokhe bemthembisa bengabuyi uSifiso waze wabulala umntwana wesikolo,” kutsho uMnu Dlodlo.
“Amapholisa la aqakathekisa ukukhangela ngokuthengwa lokuthengiswa kwenkomo ngoba esazi ukuthi yikho athola khona imali abayifumbathiswayo. Lokhu kusuka kusizwise ubuhlungu ngoba sesiswele lapho esizabika khona inhlupho zethu,” kuveza uMnu Dlodlo.
UMnumzana Thabani Mpofu oyisihlobo sikamuyi ebuzwa ngale indaba uthe ngeke akhulume lutho ngoba usezwa ubuhlungu.
“Mina ngeke ngikhulume lutho okwakhathesi ngoba ngizwa ubuhlungu kakhulu ngesiga esisehleleyo njengomdeni njalo ngisathithibele,” kutsho uMnu Mpofu.
Umfundi lo kubikwa wagijinyiselwa esibhedlela seSt Luke’s lapho adluliselwa eMpilo koBulawayo kodwa ngokuswelakala kwenhlanhla wabhubha ngemva kwelanga elilodwa.
Umthunywa wehlulekile ukukhuluma lesikhulumi samapholisa esabelweni seMatabeleland North uSayijeni Namatirai Mashona ngoba ubengekho ewofisini.
Online Reporter