admin
Joel Ndlovu
ABALIMI sebekhuthazwe ukuba balime imbambayila ngoba yisilimo esilula ukulima njalo esilenzuzo enhle kulowo osilimayo ngenxa yentengo yayo ephezulu emkambo.
Ekhuluma lentatheli kaMthunywa uMnumzana Mike Rugowo oyingcitshi kwezokulima lokufuya esabelweni seMatabeleland North uthe imbambayila ilula ukulima njalo kumele ilinywe emhlabathini okhudumalayo ukuze ikhule kuhle.
“Kuqakathekile ukuthi umlimi ahlanyele imbambayila yakhe nxa kutshisa njalo nxa inhlabathi ikhudumala. Lokhu kutsho ukuthi akumelanga ihlanyelwe ngesikhathi somqando ngoba kayivuthwa kuhle, ifuna lapho okutshisa khona.
“Nxa umlimi eyihlanyela sekuphele umqando kumele ame kudlule amaviki amane ukuze umhlabathi ubuyele esimweni sawo ukhudumale,” kulandisa uMnu Rugowo.
Uqhubekele phambili esithi umhlabathi lapho okuzahlanyelwa khona leso silimo kumele ube wakheke kuhle.
“Njengoba lesi kuyisilimo esilempande ezinde kumele umlimi ahlanyele lapho okulenhlababathi khona njalo kumele aqakathekise ukuthi utshintshanisa kuhle izilimo zakhe, ezilempande ezinde lezilempande ezimfitshane ukuze umhlabathi ungalahlekelwa yisimo esihle sokwakheka.
“Umhlabathi owakhekileyo uyavumela ukuthi ukudla okusemoyeni kungene enhlabathini ukwenzela ukuthi nxa imbambayila isihlanyelwa ithole sekuvele kulokudla, lokhu njalo kwenza ikhule kuhle.
“Amagodi okuhlanyela imbambayila kumele atshone okungaba yi-6 inch njalo kumele yehlukane nge 12 inch okuyikho okuzenza ukuthi ingaminyani,” kulandisa uMnu Rugowo.
“Nxa umlimi esehlanyelile kumele athelele ukuze isilimo sakhe sikhule kodwa engatheleli kakhulu ngoba silakho ukubola,” kutsho uMnu Rugowo.
Uphethe ngokuthi imbambayila yisilimo esikhula siphakathi kwenhlabathi ngakho sisengozini yokudliwa yizibungu okwenza kuqakatheke ukuthi umlimi ahlale ewuphendula umhlabathi wakhe ukwenzela ukuthi zife.
Okunye umlimi angakwenza yikufafaza imithi ebulala izibungu njalo iqede lemikhuhlane engahlasela izilimo.
Online Reporter