Online Reporter
Nkosilathi Sibanda
IMIDLALO yeTotal Energies Caf Under 17 Africa Cup of Nations Qualifiers kubikwa izadlalelwa enkundleni ezimbili kuleli.
Abaqoqi bomqhudelwano bathe kuzasetshenziswa inkundla yeHeart Stadium Waterfalls, eHarare laseNgoni Stadium eNorton kusukela mhlaka 11 kusiya ku-20 Mpandula. Kuzabe kuncintisa amaqembu alitshumi lambili.
IZimbabwe ibekwe kuqula likaGroup A lapho okuleMozambique, Comoros leSwatini. Kuqula likaGroup B, kuleZambia, South Africa, Madagascar leMalawi.
Intshantshu zomncintiswano wanyakenye, iAngola izabe iku-C leBotswana, Mauritius, leLesotho.
Ama-Young Warriors aqala umkhankaso wayo eleMozambique eNgoni Stadium mhlaka 11 Mpandula, ngehola lesithathu emini.
Azaphinda atshibilike enkundleni le esedlala leSwatini mhlaka 13 Mpandula kunye leComorosa ngemva kwamalanga amabili.
Abanqobi kuhlandla lamaqoqo leli kunye lamaqembu azaqeda ekunombolo yesibili, azaqhubekela phambili kuma semi-final akhangelelwe mhlaka 18 Mpandula.
