Online Reporter
Nkosilathi Sibanda
IZIMBABWE isiqinise amalungiselelo emidlalo yeConfederation of Schools Sport Association of Southern Africa (Cossasa) ezadlalelwa eSwatini ngenyanga ezayo, ngemva kokukhethwa kwamaqembu azancintisa kumqhudelwano ohlanganisa abadlali bezikolo zamabanga aphansi lezamabanga aphezulu.
Imidlalo le izaqhutshwa kusukela mhlaka 23 kusiya mhlaka 28 Ncwabakazi. Amanye amazwe aseqinisekise ukuphatheka kumidlalo yalonyaka yiLesotho, eSwatini, Malawi, South Africa njalo kuzancintiswana enkundleni yeSomhlolo leye-Olympic Africa.
Ekhuluma leZimpapers Sports Hub kuliviki, umgcinisihlalo weNational Association of Secondary School Heads (Nash), uCephas Mutumhe uthe amalungiselelo abo aqhuba kuhle njalo amaqembu akuleli azangena enkambeni mhlaka 18 Ncwabakazi, andubana kuhanjwe eSwatini mhlaka 22.
“Siphakathi kwesigaba sokucina sokukhethwa kwabadlali emaqenjini atshiyeneyo. Kusele iqembu le-volleyball, okukhangelelwe ukuthi kwenziwe iviki le isiyagqitshwa. Sizathumela amaqembu kumidlalo egoqela ukugijima, inguqu, ukuqaga, i-basketball le-volleyball,” kutsho uMutumhe.
Uthe lonyaka bacabange ukuthi baqine ngamaqembu ama-Under 18, nanko babhekane lenkinga yosekelo lwemali.
“Inhloso yethu yalonyaka yikuthi sithathe ama-Under 18 njengoba beyibo abafundi asebezatshiya esikolo sebanga laphezulu. Lokhu kube ngenxa yenkinga zemali. Ngeke sithathe amaqembu amabili.
“Sikholelwa ukuthi ama-Under 16 aseselalo elinye ithuba lokubamba iqhaza kumidlalo le. Inhloso yethu yikuthatha iqembu lokugijima, kodwa okusibisele emuva yikuswelakala kwemali, yingakho sikhethe ukuqina ngeqembu lama-Under 18.”
Ukusilela kosekelo lwemali kumidlalo yeCossasa sekubuyisele muva ukusekelwa kwethalenta elisacathula ezikolo, elidinga ukuthi libonakaliswe enkundleni eziphezulu.
Omunye wabaqeqetshi kumidlalo le, uSipho Mathebula, uthe kubalukele kakhulu ukuthi inhlanganiso yeNash isabalalise isikhalazo sayo kusase lesikhathi.
“Okudida ingqondo yikuthi iNash kukhanya iyaphuza ukudinga usekelo. Kuyaziwa ukuthi imidlalo iqhutshwa minyaka yonke kodwa sihlala siphakathi kokukhalaza ngemali. Lokhu kucina kuqeda abadlali amandla njalo lathi njengabaqeqetshi sibona sengathi sisebenzela ize ngoba phela kasitholi lutho olubambekayo.”
