admin
Kulezinsuku sokuyimvama ukuthola umlayezo kunkundla zokuxhumana usazisa ngomntwana thize olahlekileyo kumbe ongaphendukanga ngekhaya evela esikolo. Banengi abantwana abacatshayo okwenza sisale silemibuzo eminengi emakhanda.
Amapholisa axwayisa abantu ukuthi bakhangele abantwana ngaso sonke isikhathi ngoba izigangi zinengi njalo zilakho ukutshontsha abantu zilomqondo wokubabulala ukuze zona zinothe.
Ngokutsho kwesangoma uSkhunisivuthemanzini Mkhize abantwana abanengi abacatshayo babulawelwa umuthi.
“Umuthi wakhona bawusebenzisa ukuze bazongele ukuceba,” kutsho uMkhize.
Ubikele intatheli ukuba abantwana abanengi abacatshayo batholakala imizimba yabo isicuyiwe.
“Kwezinye izikhathi kuba lula ukunanzelela ukuthi umzimba ucuyiwe kuthi kwezinye izikhathi kungabinjalo.”
Uthe abantu abenza kanje ngabalenhlizyo ezimbi abalakho ukwenza yiloba yini ukuze babelemali enengi.
Esinye njalo isangoma uNzama Maluleke sithe abantu abafuna ukunotha ngalindlela ekhohlakeleyo basebenzisa imizimba yabantwana ngoba bamsulwa.
“Izangoma eziqotho aziphathisi abantu ukuthi benze ihlazo elinje.
“Yikho nje sihlala sigqugquzela ukuthi izangoma kumele zilawulwe ngumthetho thize lapho ezisebenza khona.
“Akumelanga siphongukuvumela yiloba ngubani ukuthi asebenze njengesangoma,” kutsho uNzama. Uthe kuqakathekile ukuthi kungaba lomntwana olahlekileyo kumbe ongabonakaliyo abantu baphangise bazise amapholisa.
Kumqoka ukukwenza lokhu ngoba akwaziwa okungenziwa yizigilamkhuba lezi nxa sezithe zathatha abantwana.
Online Reporter