admin
Mehleli Dube
MIHLA ngemihla emhlubulweni weMatebeleland kuvukwa kutshontshwe imbuzi, inkomo ngitsho sibi sabobababhemi.
Ubusela bezifuyo sebusezingeni eliphezulu, phela ungathi ubusela babuhambela esikolweni. Into ezwisa ubuhlungu yikuthi kwesinye isikhathi nxa bezama ukufihla ubufakazi ziyabulawa ngokunathiswa itshefu zife zijanqula okomthakathi zona zingone lutho.
Ngikhumbula ezinye ezatshontshwa kweleBotswana ezingu-27 zadutshulwa zafa ngoba bethi umthetho wakweleBotswana uthi zingachaphela ngapha funa zibuyele sezilomkhuhlane zithelele eziseleyo.
Zadutshulwa inkomo zingazi lutho zizentshisela nje ilibele inyamazana kaMlimu izwe qhwa. Uthola lezikhumba inkomo isimabavubavu kucitshwa imitshiso yabanikazi kufakwa eyamasela.
Kungatshontshwa ezilamathole ziyabotshwa imilomo ngencingo ukuze zingakhali funa ziphaphise inyoni. Obabhemi bangatshontsha abalamathole kuhlahlelwa onina kukhule kuzintandane lochago kuhle kuluphuse phela sokusele okusatonkwana ungasabakwazi.
Kwesinye isikhathi onina babotshelwa phezulu kwentaba babotshwe imilomo ukuze bangakhaleli abantwana baze bazifele ngendlala, isihluku esinganani ezifuyweni.
Imbuzi zona abazithathi mango ngoba yinto ebulaleka lula njalo lenyama yakhona ihlezi ifunwa ngabantu abehlukeneyo, abamabhutsha otsheketsha ziqunywa amakhanda kukhitshwe lezangaphakathi kuphoselwe izinja, phela amasela acabanga ukuthi kulungiswa inhloko lezangaphakathi ngabaninizibaya, ukuthi imbuzi ezitshontshiweyo zingakhali ziyabotshwa imisipha ngocingo luthi mfi ngeke uyizwe iwuvula ithi me.
Ngikhumbula amanye amasela athi elahlisa umkhondo bathatha imbuzi bazijikela emgodini owawungasasebenzi zabotshwa imilomo lolimi ngencingo zaqeda iviki ziphakathi zaze zabulawa abadingayo sebedelile, yathengiswa inyama.
Lunengi uchuku olwenziwa ezifuyweni engingeke ngabalisa ngakuqeda, yingakho ngithi kwabe SPCA sizani bo.
Ayixabene.
Umlobi ungamthinta ku: 0714355641
Online Reporter