admin
Nkosilathi Sibanda
SEKUSELE amalanga nje ukuthi abalandeli benguqu bakwazi ukuthi nguphi umdlali ozangena kuqula lengcitshi ezidlale kuhle kulisizini.
Lonyaka, ngendlela ibhola lakuleli eliwe ngayo, kuzakuba nzima ukuphuma lengcitshi ezakhethwa njengomdlali owedlule bonke.
Iqembu elizaqeda isizini le likhotha imlomo ngeleHighlanders. Abadlali balithimu kuzamele bavale ubuso ngokuyangeka ngoba kulithimu kuphuma umdlali oyedwa-uKnox Mutizwa. Abanye loba sekutheni abangeke babalelwe kungcitshi zenguqu.
Ngaphandle kokuthi uMutizwa uhlohle amabhola amanengi, indlela adlale ngayo ibeyinsika yokunqoba kweBosso kweminye imidlalo.
UMutizwa usethele amabhola alitshumi lambili.
Umdlali lo wenelise ukuthi angalithola ibhola angancitshani kodwa aledlulise kwabanye. Lalapho iBosso ihlohla, nguye obeqale lebhola.
Kumbali yeBosso kuligi esekelwa yeCastle kusukela ngo2011, ithimu le ibingakaze ithole umdlali oyedwa kukhalenda.
Okwalonyaka akumangalisi kodwa kuyayangisa.
UMutizwa okwamanje usetshengise ukuthi iligi ephakemeyo kuleli ayila abadlali ababukhali emazwaneni nanko phela ukhuthe imidlalo eminengi wenela ukuqhubeka ekhokhela kubadlali asebehlohle amabhola ukwedlula abanye.
Iphephandaba likazulu lidibane loMutizwa ekukhefu lokulolonga ngoLwesithathu. Umdlali lo ubike ukuthi isifiso sakhe yikuthi ahluthune isicoco somdlali ohlohle amabhola amanengi.
“Ngifuna ukuthenga indlu. Isicoco leso ngesami. Ngizazama ukuthi ngihlohle,” kutsho umdlali lo.
Kusele imidlalo emithathu ukuthi iligi iphele, umbuzo okhona yikuthi uMutizwa uzenelisa na ukuthi agcwalise isifiso sakhe.
Iligi yeCastle Lager imisiwe kuliviki, okutsho ukuba uMutizwa uzahlohla ngeviki elizayo mhla iHighlanders idibana leHwange emalahleni.
Abadlali abaseduzane lokuncitisa isicoco esikhulu:
Mutizwa Knox (Highlanders)- 12, Chirambadare Edmore (Chicken Inn)-11, Chitora Tinei (Chapungu)-8, Manuvire Rapheal (ZPC Kariba),8 Muzondiwa Brain (FC Platinum),7 January Timothy (How Mine)
Online Reporter