Ethel Ncube
KUDABA olutshiye abantu bemangele, kulenina leChipinge elibanjwe litshwathike imbanje phakathi kwezembatho zesonto ngempelaviki.
Inina leli, uShuvai Chauke, oleminyaka engu-43 yokuzalwa ovela esiqintini seMutandahwe ngaphansi kwenduna uGarahwa eChipinge, ubotshwe ngeSonto emgwaqweni osuka eNgundu usiya eTanganda ngemva kokuba amapholisa ehlole ibhasi abeyigadile.
Kubikwa uChauke ubegqoke isiketi esimhlophe futhi ebophe leqhiye emhlophe, njalo ubegoqele isaka le-50kg lembanje ngezembatho zakhe zesonto.
Isikhulumi samapholisa eMasvingo uInspector Kudakwashe Dhewa ufakaze ngodaba lokubotshwa kwenina leli ebeligoqele isaka lembanje ngezembatho zesipostoli.
“Amapholisa emgwaqweni esebenzisana labacuphi be-CID babehlola izimota emgwaqweni osuka eNgundu usiya eTanganda.
“Kwamiswa ibhasi ye-Stallion eyayisiya koBulawayo njalo aqalisa ukuyihlola. Phakathi kwatholakala amasaka amancane ayisithupha alembanje ayefakwe esakeni elikhulu elingaba yi-50kg, elaligoqelwe ngezembatho ezimhlophe zesonto. Ekuhlolisiseni kwavela ukuba isaka lelo ngelikaShuvai Chauke owabuye wachaza ukuba uzithethe eMozambique njalo uyazithengisa kwenye indawo,” kuchaza uInsp Dhewa.
Inina leli lahle labotshwa ngamapholisa eChiredzi imbanje zathathwa.
U-Inspector Dhewa ukhuthaza uzulu ukuba atshiyane lomkhuba wokuphatheka ekuthengisweni kwezidakamizwa njalo alandele umthetho ngoba labo abazatholakala bephatheka ekuthengiseni kumbe lekuthwalweni kwezidakamizwa bazajeziswa.
