INYANGA zilomsebenzi omkhulu njalo zibalulekile kumpilo yabanye abantu abansundu ngoba kukholelwa ukuthi zidlala indima enkulu yokusiza abantu ukuze isizwe sakheke.
Ekadeni beziyizo odokotela, ziyizo njalo ezipha amacebo, zilungisa konke okonakeleyo ngobuqotho.
Bezihlonitshwa ngendlela emangalisayo njengabafundisi kulezinsuku kodwa kulezinsuku seziguquke zaba yizitha zikaZulu abathakathi bezigodo! Impisi eziphanga emini libalele.
Lezinsuku zinengi izindaba esizizwayo kuthiwa umuntu ubulele wacuywa izitho ngoba elaywe yinyanga ethile ukuze athole inotho.
Zinengi inyanga eziziqhenya ngokuthi ziyenelisa ukwenza yiloba yini efunwa ngumuntu kungakhathalekile ukuthi kubi okunganani. Isimanga yikuthi inyanga ezenza njalo ziyaphika zembe phansi ukuthi zingabathakathi kanti pho nxa umuntu ephathisa umuntu ukuthi abulale ngesihluku ngoba usithi uzaceba ayisibo buthakathi na?
Nxa ulaya umuntu ukuthi enze izenzo ezitshwaqisa umzimba, ukuze abe lenotho angayisebenzelanga ngezandla zakhe kambe kayisibo bubi na lobu?
Inyanga ezinengi nxa zisenza ukuganga kwazo zigijimela ukuvika ngokuthi zisiza uzulu.
Umbuzo okhona yikuthi ukubulala umuntu ongelacala kusiza njani umphakathi?
Nxa inyanga lezi ziqinisile ukuthi zisiza umphakathi kungani zingacabangi ubuhlungu obuzwiwa ngamalunga emuli zalabo abathi ababulawe ukuze omunye acebe?
Nxa besakha impela kungani bengakhuthazi labo ababacela ukuthi babalungisele ukuthi bayesebenza gadalala ebusuku lemini ukuze babelenotho kulokubulala. Imitshado eminengi ichithekile ngenxa yalezinyanga zamanga ezinika abantu imithi yokudlisa omkabo kanye lezifaka abantu ulunyoka.
Inengi lenyanga zakhathesi zizigijimisela imali nanko phela ukwelapha kwazo kuhamba ku-adivethayizwa njengebhizimusi. Imali isihamba phambili kuthi ukusiza uzulu kuze ngemuva.
Ngenxa yokubhaha kwenyanya ezigangileyo lezi, lezamanga kusuka kudide umqondo ukuthi inyanga ziyingxenye yokwakhiwa kwemideni kanye lesizwe noma hatshi. Zona inyanga zoqobo zisesekhona kumbe sekungabathakathi bodwa?
Yona iZinatha, ekhangela ngokusebenza kwezinyanga ithini ngokuziphatha kwamalunga ayo la achaya ukuganga kwawo egcekeni. Nyathelo bani elithathwayo ukuze ihlanze igama layo eselisemanyaleni ngenxa yalezizigilamkhuba?
Kungumbono woMthunywa ukuthi nga inhlanganiso le ibeka imithetho lezinqumo ezithile ngokusebenza lokuziphatha kwamalunga ayo.
Kuqakathekile njalo ukuthi ibuye ilandelele wonke amalunga ayo ukuze ibone ukuthi izinqumo lezo ziyalandelwa ukuze kungagcoliswa igama lenhlanganiso kunye lesizwe ngobubi bazo.
