admin
UBOTSHIWE unogada wekhansili weMpofana, eMooi River okusolwa ukuthi udubule wabulala ijaha kubangwa ukuthi belingafakanga isaheke lingena komasipala.
Kungumthetho kahulumende ukuthi wonke umuntu afake isaheke esivala amakhala lomlomo uma esendaweni yomphakathi ngoba kwenziwa izaba zokunqanda ukubhebhetheka kweCovid-19.
Isolezwe ngeSonto lihabule ukuthi uMnumzana Lindokuhle Mchunu (25) ubehamba lomngane wakhe besiyadinga incwadi thize emahofisini kamasipala ngesikhathi umsolwa ecela ukuba umufi afake isaheke.
Imibiko ithi umngane kamufi ubesifakile esakhe isaheke, wangena ngaphakathi eyofuna usizo, umufi wasala kanti uzasala edutshulwa. Kuvela ukuthi umufi ubengayizwa indaba yesaheke, ekhombisa ukungamlaleli unogada bejikijelana ngamazwi.
Kuthiwa bahilizisane lonogada kwaba kubi, waze wahwatsha isibhamu wadubula umufi, ogijinyiselwe esibhedlela kwafika kwamqinisa.
Okhulumela amapholisa KwaZulu-Natal, uColonel Thembeka Mbele ukuqinisekisile ukuthi ikhona indoda eleminyaka engu-31 esobozelwe ezakwadalawane ngecala lokubulala elenzeke emahofisini kamasipala.
“Likhona icala lokubulala elivulwe esiteshini saseMooi River emva kokuthi amapholisa ethintiwe ngesehlakalo sokudubula.
Amapholisa ngesikhathi efika endaweni yesehlakalo athole ukuthi kulomuntu odutshulweyo, waphuthunyiswa esibhedlela, wacina ngokutshona ekhona.
Umsolwa ubotshiwe, wavela eNkantolo yeMantshi weMooi River ,’’ kuchaza uColonel Mbele.
UMasipala weMpofana kawuqali ukuba lenkinga ngodaba oluthinta imigomo yeCovid-19. Ngomnyaka odluleyo ngenyanga kaNhlangula, usodolobho wayo uMnu Mxolisi Duma yangena enkingeni emva kokumemezela izibalo zabantu abahaqwe yiCovid-19 endaweni.
UDuma waqopha i-video etshela abantu ukuthi isifo sidla kubi endaweni, mabaqaphele, etsho lezindawo ezilabantu abalesifo. Lokhu kwamqhwandela ulaka ngoba yizikhulu zezempilo kuphela ezilemvumo yokuchaza izibalo zabahaqekile.
Online Reporter