admin
YiNtatheli kaMthunywa
INKOKHELI kwezemfundo zikhuthaza uzulu ukuthi aqakathekise ukungenisa abantwana kuzifundo zeEarly Childhood Development (ECD) ngenhloso yokuthuthukisa imfundo yakuleli.
Lokhu kuvezwe nguMphathintambo wogatsha lwezemfundo yaphansi leyaphezulu uDokotela Lazarus Dokora esemhlanganweni wezemfundo obusesikolo seFatima High School eLupane ngoLwesihlanu kuviki ephelileyo.
Ekhuluma kulumhlangano uDokotela Lazarus Dokora uchaze ukuthi amaECD Centres aqakathekile kakhulu.
“AmaECD Centres amqoka ngakho kufanele wonke umntwana adlule khona engakayi kuGiredi 1. Lokhu kungenxa yokuthi lelibanga yilo elidala ukuthi umntwana ahlakaniphe njalo ingqondo yakhe ikhaliphe masinyane.
“Ngitsho ngenxa yokuthi abanye abantwana bayabe bekhuliswe kubi behlupheka kumbe bekhathazwe besaseziswini zabonina ngakho labo kabakhuli belengqondo ezikhaliphe njengezabaphathwe kuhle besaseziswini baze bakhula. Ngalokhu-ke ibanga le ECD lidala ukuthi abantwana abanjalo bakhule belemiqondo efanayo.
“Ngalokhu-ke akusavunyelwa ukuthi umntwana ayefunda uGiredi 1 engazange wadlula ku-ECD A laku ECD B,” kutsho uDkt Dokora.
UDkt Dokora uqhubekele phambili njalo waveza ukuthi ama ECD Centres la kufanele abhaliswe kuMinistry of Education.
“Okunye njalo ama ECD Centres la kuqakathekile ukuthi abe ngasemthethweni ukuze ahlolwe ngabezemfundo ukuthi asebenza ngendlela efaneleyo yini. Lokhu kungenxa yokuthi inengi lama ECD Centres la angabhaliswanga ngokusemthethweni asuka anathise abantwana amaphilisi okubalalisa bengaphiwanga isikhathi sokudlala kanye lokunye okufanele bakwenze njengabantwana abaku ECD.
“Lokhu kuyingozi kakhulu ebantwaneni ngoba kubabulalela imfundo yabo njalo yikho okudala ukuthi umntwana akhule engakhaliphanga. Ngalokhu-ke inengi lama ECD Centres elingekho emthethweni liqakathekisa imali hatshi imfundo yomntwana yikho okudala ukuthi abantwana abafunde endaweni ezinjalo bengaphumeleli kuhle ezifundweni”, kuphetha uDokotela Dokora.
Online Reporter