admin
Incwadi yokuzalwa ngeyinye yamaphepha aqakathekileyo ebantwini. Kwabanye abantu kungaba liphepha nje abalibona lingaqakathekanga. Iqiniso yikuthi incwadi yokuzalwa iqakathekile njalo yiyo esetshenziswa ukutsho ukuthi umuntu ngubani, lanxa umuntu efuna ukubhalisa ulutho ngebizo lakhe kumele abelayo incwadi yokuzalwa. Ngeke ufunde, ubesemidlalweni kumbe ukuya endaweni ezithokozisayo ezesikolo (school trips) ungela yo incwadi yokuzalwa.
UThubelihle Ndlovu yintombazana eleminyaka engamatshumi amabili lantathu, kalancwadi yokuzalwa. Abazali bakhe babhubha esasemncane kakhulu. UThubelihle Ndlovu kakwazi ukuba abazali babo babhubha nini yena wasala logogo bezihlalele ekhaya. Ngemva kokubhubha kwabazali bakhe uThubelihle Ndlovu wahlala logogo wakhe waze wafika kuzinga lesikhombisa esikolo.
Kwathi sokumele abhale yaqala inkinga manje. Basebefuna incwadi yokuzalwa esikolo. Kwasekutholakala ukuba vele akalayo lencwadi yesibhedlela kanye le-card lesibhedlela, kasenelisanga ukuqeda imfundo yakhe ngoba kungekho emthethweni ukuthi abhale engelazo incwadi.
Abanye abantwana babesithi nxa besiya esikolo yena asale ehlezi endlini, lokhu kwakumzwisa ubuhlungu kodwa laye ugogo kungekho ayekubona kufanele akwenze. Wahlala waze wabayintombi waba lowakhe umntwana uThembelihle Ndlovu wasebuya edolobheni ethi uzozama impilo waba lenhlanhla yokuhlangana labasebenza eTrinity Project.
Wachazelwa uThubelihle Ndlovu ukuba kuqakathekile ukuthi abelencwadi yokuzalwa ukuze enelise laye ukuthathela owakhe umntwana incwadi yokuzalwa ngoba wonke umuntu elelungelo lokuba aziwe ukuthi ungubani ozalwa ngubani njalo anelise lokufunda ngoba kulilungelo lomntwana wonke ukuthi afunde.
Wananzelela uThubelihle ukuba ngempela kuqakathekile ukuba umntwana abelamaphepha ukuze engedluli kudubo adlula kulo. Waseqala-ke ukuba alandele izixwayiso aziphiwayo ezokuba enelise ukuba lamaphepha.
Waqala ngokuyadinga ukuthi wazalelwa ngaphi lokuba wayehlatshwa ngaphi waze wakuthola. Wasecela ugogo labo malume ukuba bamncedise ukuthatha incwadi kanina yokufa ukuze enelise laye ukuba lencwadi yokuzalwa.
Akuzange kubelula kodwa ngosizo lwe-Trinity lezihlobo zakhe waphumelela wabalencwadi ezeneleyo wasethathela lowakhe umntwana.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773 195 055
Online Reporter