admin
Joel Ndlovu
ABALIMI sebekhuthazwe ukuba baqakathekise uhlelo lokutshintshanisa izilimo zikhathi zonke ukuze umhlabathi wakheke njalo uhlale ulokudla okudingwa yizilimo.
Ekhuluma lentatheli kaMthunywa uMnumzana Kevin Moyo oyingcitshi kwezokulima esabelweni seMatabeleland North uxwayise abalimi ukuba batshintshanise izilimo abazihlanyelayo ngoba kwenza umhlabathi wakheke kuhle.
“Ukutshintshwa kwezilimo kwenza umhlabathi wakheke kuhle njalo ubesesimweni esihle esizavumela ukuthi isilimo esilandela ukuhlanyelwa sithole inhlabathi ilokudla okunengi ingela zibungu ezizakudla impande.
“Nxa izilimo zingatshintshwa izibungu ezidla impande zezilimo ziyagcwala emhlabathini zibulale zonke izilimo ezilandela ukuhlanyelwa lapho,” kuchaza uMnu Moyo.
Uqhubekele phambili esithi umlimi kumele ananzelele ukuthi utshintshanisa izilimo ezilempande ezinde lezile mpandle ezimfitshane.
“Izilimo ezilempande ezinde ziyabulala isimo senhlabathi, kukanti ezilempande ezimfitshane ziyawakha. Isibonelo: ihanyanisi iyakha umhlabathi kungakho umlimi nxa etshintsha izilimo akumelanga atshintshanise izilimo nje, kumele atshintshanise kusiya ngempande zazo,” kutsho uMnu Moyo.
Kubikwa umlimi engahlala ehlanyela isilimo esisodwa sikhathi sonke izibungu zicina zisanda emhlabathini okwenza kubenzima ukuthi umlimi azilwise.
UMnu Moyo uphethe ngokuthi umlimi kumele aqakathekise ukutshintshanisa izilimo njalo afafaze izibungu ngemithi ukuze imikhuhlane ingahlaseli izilimo.
Online Reporter