admin
Buhlebenkosi Gaule
INKAMPANI ebona ngezokuhanjiswa kwemibiko i-Postal and Telecommunications Regulatory Authority of Zimbabwe (Potraz) isizinike umlandu wokuphathisa abafundi lababalisi kwezemfundo ngokusungula uhlelo olubizwa ngokuthi yi-Classroom Management Software olwenza ukufunda kubelula ngoba kusetshenziswa amakhompuyutha.
Ngeviki edluleyo embukisweni weZimbabwe International Trade Fair (ZITF) inkampani yePotraz ibibukise okuphathelane lohlelo lokufunda ngamakhompuyutha.
Ababalisi beMzimuni Primary le Mzimuni High School bebekhona betshengisa uzulu ukuthi uhlelo lolu lusebenza njani. Kuhlelo lolu abafundi bayabe belamakhompuyutha ayabe exhumene lekhompuyutha yombalisi okwenza kubelula ukuba umbalisi enelise ukuxoxisana lokuncedisa abafundi esebenzisa amakhompuyutha.
Omunye wababalisi uthe balokuthokoza ngohlelo lwePotraz oluzenza ukufundisa kunye lokufunda kubelula.
“Uhlelo lwePotraz lolu luzenza umsebenzi wethu njengababalisi ube lula ngoba uhlelo lolu lwenza kube ngcono ukuxoxisana labantwana lokuba ababalisi bananzelele amaphutha omntwana munye ngamunye besebencedisana lomntwana odinga usizo”.
“I-Classroom Management Software yenza abalisi benelise ukunanzelela ukuthi abafundi badedela muva kuziphi izifundo. Nxa kuyisikhathi sokufunda isamu ngiyabe ngibona ukuba umntwana uyenza njani ngiphinde nginanzelele ukuthi uzwisisile na akufundileyo. Okunye njalo nxa kulomntwana owenza amaphutha ikhompuyutha ihle ikutshengise lokhu, ngokunjalo ngiyenelisa ukufinyelela lowo mntwana ngibone ukuba ulahleka ngaphi,” ngamanzwi kaMnu Nkosiyazi Fuyana umbalisi weMzimuni Primary.
UMnu David Madondo ongu-Project Engineer ePotraz onguye ololwazi olujulileyo ngaloluhlelo uphethe ngokuthi inkampani yabo yananzelela ukuba izikhathi ziyatshintsha, wonke umntwana kulezi insuku njalo wonke umntwana kumele azi ukusebenzisa ikhompuyutha yikho basungula uhlelo lolu.
“Uhlelo lolu salusungula njengePotraz sihlose ukuncedisana logatsha lwezemfundo ngoba sinanzelele ukuba izikhathi ziyatshintsha njalo abafundi kumele bafunde ukusebenzisa imitshina lamakhompuyutha akulezinsuku bengesabi ngoba abanye lokhe besesaba ukusebenzisa amakhompuyutha.
Ngalokhu abafundi bakhula besazi ukusebenzisa amakhompuyutha okuyinto emqoka kulezinsuku,” kuphetha uMnu Madondo.
Online Reporter