admin
UKUTSHOTSHOZELA kodonsi kwaziwa ngumthaphi wenyosi, mahlabezulu ukutshelwa yikuncitshwa lani liyakwazi ukuthi iphephandaba likazulu lidume ngabantu abeza ukuzolijabulisa ngaso sonke isikhathi. Lokhu ngikutsho ngoba lamhlanje ngiphethe indoda emadoda mabili kwezomculo edume njengelanga langeKhisimusi.
Indoda esikhuluma ngayo lapha nguTheophilus Mabvudzi odume ngokuthiwa nguBob Skinnah ongumculi we-house music kanti njalo ngu-producer wezingoma ezehlukeneyo. Mthwakazi lawe ungazizwela ngezakho kungxoxo ephakathi kwentatheli yephephandaba likazulu uMoyo Johas (MJ) loBob Skinnah (BS).
MJ: UMthwakazi uthanda ukuba kwazi ukuthi ngubani uBob Skinnah umculo wakhe kanye lembali yokukhula kwakhe.
BS: Ngamafitshane ngazalwa mhlaka 4 kuZibandlela ngomnyaka ka-1982 eMasvingo. Ngayaqalisa uGiredi 1 esikolo seRhodes Estate eMatopo. Ngaqhubeka ngezifundo zami eMzingwane High eSigodini. Ukuhlabela ngaqala ngimncane e-primary ku-choir. Kuthe ngokukhula kwami kangizange ngenze eminye imidlalo esikolo kodwa ngahle ngaphatheka kwezokuhlabela. Ukucula okuzwayo ngikhupha amadlalade labanye ngaqalisa ngo-2000 ngasengiqalisa ukupheka ingoma kakhulu okuyinto engijabulisa kakhulu esengiyenza khathesi.
MJ: Umphakathi uthanda ukubakwazi ukuthi lindoda edume kangaka seyakhupha amadlalade amangaki, usucule ukuziphi indawo njalo ulabo bani?
BS: Ngiqalisa okomculo sasibane labangane bami bonke sebahamba phetsheya kwelizwe okuyikho abacula khona, sakhupha amadlalade amanengi, elokucina nguBulawayo Knights elithandwa ngabantu abantu njalo sengisebenza labantu abanengi ngibancedisa ukupheka ingoma zabo. Engibancedisayo bagoqela uJeys Marabini, uCooper Man, uQeqetshiwe, uBeekay, uMfundisi Masofa loBaShupi. Ngincedisa labantu ukuthi bapheke kuhle ingoma zohlobo lwengoma zokholo, iAfro Jazz, iRagga labo-Dancehall. Sengike ngayadlala umculo wami kweleBotswana kanye leMalawi. Lapha eZimbabwe ngiyake ngihambe emaphandleni ngisiyadinga ontanga abaleziphiwo kwezomculo.
MJ: Bathini abantu ngomculo wakho lokupheka ingoma njalo akutshele umphakathi ukuthi ubathembisani lonyaka.
BS: Abantu bayawujabulela umculo wami kanye lokupheka kwami ingoma. Bangikhuthaza ukuthi ngiqhubekele phambili ngoba inengi engaqalisa lalo selihlabela lingaphetsheya kodwa mina ngifisa ukuthuthukisa isizwe sethu, izinto kumele zisuke lapha ezinhle zisiya phetsheya kukhanye ukuthi lakithi ithalenta likhona. Lonyaka ngifisa ukupheka ingoma ezinengi ngijabulise abantu. Abenelisayo bengangithinta ngibafundise ukutshaya isiginci, kanye lokutshaya icaco le-piano.
MJ: Akutsho nsizwa yakithi, selokhe waqalisa ukucula lokupheka ingoma sowathola indondo ezingaki njalo ngaphandle kokucula kuyini okunye okwenzayo?
BS: Angikaze ngithole isicoco kodwa abanye engabancedisayo sebazithola uBeekay wathola ezimbili ngaphetsheya kuthi uCooper Man waqanjwa kundondo zeMzansi yiloba indondo engasayitholanga. Kangila okunye engikwenzayo empilweni ngaphandle kokupheka ingoma ngoba sengakwenza ukuthi kuhle kube yingxenye yempilo yami.
MJ: Bunzima bani ohlangana labo njengomculi lompheki wezingoma njalo nkuthazo bani oyipha abanye abaculi labapheki bezingoma?
BS: Bunengi ubunzima esihlangana labo. Okwakuqala kasilayo indawo yezomculo ngoba singelabo abantu abasisekelayo njengokwenziwa kwamanye amazwe. Abantu abaphakamisa umculo kabasiqakathekisi kodwa kungabuya umculi ovela phandle bamupha imali enengi asuke ahambe thina singatholi lutho. Sicela ugatsha lweNational Arts lusisingathe luvikele amalungelo ethu njengabaculi lathi sithuthuke. Ngikhuthaza abantu ukuthi sibambane singahlukuluzani singabantu banye. Akube lezakhiwo njengama-clubs asekela impumela yomculo, inhlonipho yande singakhangelelani phansi.
Online Reporter